«Կուզեի լսել ՀՀ իշխանություններից ձեր ակնկալիքների մասին». նախագահը՝ Բելառուսի հայ համայնքի ներկայացուցիչներին

«Ինձ համար կարևոր ու հաճելի է արտերկիր այցերը սկսել հայ համայնքի հետ հանդիպումներով, քանի որ դրանք հարազատ վայրում գտնվելու զգացողություն են հաղորդում»,- ասել է Հայաստանի նախագահ Արմեն Սարգսյանը՝ երեկ երեկոյան Բելառուսի հայ համայնքի ներկայացուցիչների հետ հանդիպման ժամանակ. տեղեկացնում է ՀՀ նախագահի պաշտոնական կայքէջը:

«Կուզենայի, որ երկխոսություն ծավալվի, և լսեի ձեզ հուզող հարցերի ու Հայաստանի իշխանություններից ձեր ակնկալիքների մասին»,- ներկաներին, ովքեր ոչ միայն համայնքային կազմակերպությունների, այլև Բելառուսի գործարար և գիտական շրջանակների ներկայացուցիչներ էին, ասել է նախագահ Սարգսյանը։

Զրույցի ընթացքում խոսվել է հայ-բելառուսական հարաբերությունների, երկկողմ տնտեսական և մշակութային կապերի խորացման գործում հայ համայնքի դերի, համատեղ ծրագրերի իրականացման հնարավորությունների, ինչպես նաև համայնքային կյանքին վերաբերող հարցերի մասին։ Անդրադարձ է կատարվել նաև Հայաստան - Սփյուռք հարաբերություններին, սփյուռքի ներուժն օգտագործելու հնարավորություններին, Հայաստանի զարգացման հեռանկարներին։

Համայնքի ներկայացուցիչները կարևորել են Հայաստանի ղեկավարության հետ նման շփումները՝ նշելով, որ դրանք թույլ են տալիս իրենց հայրենիքի մի մասնիկը զգալ, տեղեկանալ Հայաստանում կատարվող գործընթացներին և հնարավորինս ներգրավվել տնտեսապես ուժեղ և բարեկեցիկ հայրենիք կառուցելու գործում։