«Դատապարտում ենք նման գործարքները». Նիկոլ Փաշինյանը՝ Ադրբեջանին բելառուսական զենքի մատակարարումների մասին

«3 ամիս առաջ հայտնի «Պոլոնեզ»-ների խմբաքանակ էր մատակարարվել, որոնց հետ կապված պայմանագիրը ստորագրվել էր շատ ավելի վաղ: Եվ այդ ամենը տեղի էր ունեցել մի պայմանում, երբ Հայաստանի ներկայացուցիչը ՀԱՊԿ գլխավոր քարտուղարի պաշտոնն էր զբաղեցնում: Իհարկե, մեր դիրքորոշումը շատ հստակ է: Մենք դատապարտում ենք նման գործարքները, դրանք համարում ենք ուղղված ընդդեմ Հայաստանի ազգային շահերի»,- այսօր մամուլի ասուլիսի ժամանակ հայտարարել է ՀՀ վարչապետի պաշտոնակատար Նիկոլ Փաշինյանը՝ պատասխանելով լրագրողների հարցերին:

«Մենք մեր պարտավորությունները լիարժեք կատարում ենք, ինչը, ցավոք, չենք կարող պնդել մի շարք այլ գործընկերների դեպքում: Եվ մեր խնդիրն է ունենալ այս հստակեցումները՝ փոխադարձ հարաբերությունները ճշտելու և պարզ քաղաքականություն վարելու համար»,- հավելել է Ն. Փաշինյանը: