«Հայաստանը որևէ բանակցություն չի վարում մեր երկրի տարածքում երրորդ երկրի զինվորների տեղակայման մասին». Աննա Նաղդալյան

Վերահաստատում ենք, որ այդ լաբորատորիաները պատկանում են Հայաստանին: Այս մասին այսօր ճեպազրույցի ընթացքում ասել է ՀՀ ԱԳՆ մամուլի խոսնակ Աննա Նաղդալյանը՝ մեկնաբանելով Ռուսաստանի արտաքին գործերի նախարար Սերգեյ Լավրովի հայտարարությունը:

«Սանիտարահամաճարակային վերահսկողության ոլորտը հայ-ռուսական օրակարգի մի մասն է կազմում, և այդ հարցի շուրջ համագործակցության երկխոսություն կա: Ինչ վերաբերում է կենսալաբորատորիաներին, պարզապես պետք է վերահաստատել, որ այդ լաբորատորիաները պատկանում են Հայաստանին, վերահսկվում են Հայաստանի կողմից, այնտեղ աշխատում են բացառապես հայ մասնագետները: Եվ այն բացառապես քաղաքացիական բնույթ է կրում: Իսկ ինչ վերաբերում է պայմանագրի հարցին, պետք է ասեմ, որ Հայաստանը որևէ բանակցություն չի վարում մեր երկրի տարածքում երրորդ երկրի զինվորների տեղակայման մասին»,- ասել է ՀՀ ԱԳՆ մամուլի խոսնակը:

Հիշեցնենք, որ օրեր առաջ Ռուսաստանի արտաքին գործերի նախարար Սերգեյ Լավրովը հայտարարել էր, որ Ռուսաստանը Հայաստանի հետ Հայաստանի տարածքում օտարերկրյա զինվորականների բացակայությունը երաշխավորող փաստաթուղթ կստորագրի: