Մանվել Գրիգորյանի փաստաբանը՝ վերջինի առողջական վիճակի, սեփականացրած վկայականների և Մարտի 1-ի մասին

«Հատուկ քննչական ծառայությունը հայտարարություն տարածեց, որ թվով 20-30 սեփականության վկայականներ ուղարկել է, որպեսզի պետական մարմիններն սկսեն գործառույթներ իրականացնել: Մոտ 6 ամիս քննեցին, զննեցին այդ իրավունքի հիման վրա, տեսան հանցակազմ չկա, հիմա էլ ուղարկում են գյուղապետերին՝ ցուցում են տալիս, որպեսզի մտնեն դատական պաշտպանության մեջ՝ այդ տարածքների գործարքներն անվավեր ճնաչելու համար»,- այսօր լրագրողների հետ հանդիպմանն ասել է Մանվել Գրիգորյանի փաստաբան Լևոն Բաղդասարյանը:

Վերջինը նշել է, որ վարույթ իրականացնող մարմնի միակ փաստարկը, որ բերվում է Մանվել Գրիգորյանի ազատ արձակման դեմ, այն է, որ ասում են, թե նա դուրս գալով մեկուսարանից, կգնա Արցախ, և քանի որ Արցախը իրավական կարգավիճակ չունի, ուստի այնտեղից չեն կարող իրեն ետ բերել:

Փաստաբանն անդրադարձել է նաև գլխավոր դատախազի և ցուցարարների հանդիպմանը: Լրագրողի դիտարկմանը, թե դատախազն ասել է՝ բողոքարկելու են դատարանի որոշումը և, բացի այդ, խոստացել լրացնել Մանվել Գրիգորյանի մեղադրանքը նշելով՝ «չկասկածեք, որ հիմնավոր փաստեր ենք ներկայացնելու», փաստաբանը պատասխանել է՝ թող լրացնեն, ներկայացնեն, արձագանքը կլինի:

Հաջորդ հարցին, թե հնարավո՞ր է Մանվել Գրիգորյանն ազատ է արձակվել այն պայմանով, որ պատրաստակամություն է հայտնել Մարտի 1-ի հետ կապված ցումունք տալ, Լ. Բաղդասարյանը հերքել է այդ վարկածը՝ նշելով, որ նման բան չկա, և իր պաշտպանյալի գործը Մարտի 1-ի հետ բացարձակապես աղերս չունի:

Անդրադառնալով Մ. Գրիգորյանի առողջական խնդիրներին, Լ. Բաղդասարյանը տեղեկացրել է, որ երեկ երեկոյան բժշկական միջամտություն է եղել «Շտապ օգնության» կողմից: Մանվել Գրիգորյանն իր բուժումներն ընդունում է տանը, անհրաժեշտության դեպքում՝ հիվանդանոցում: Դատարանը Մանվել Գրիգորյանի ազատ արձակելու որոշումը կայացնելիս՝ նաև հաշվի է առել անձի առողջական վիճակը: