«Հաշմանդամություն ստացած զինծառայողներն աշխատանք կունենան». Արմեն Սարգսյան

Արմեն Սարգսյանն այսօր՝ Բանակի օրվան նվիրված պարգևատրման արարողության ժամանակ ասել է, որ ՀՀ նախագահի ինստիտուտը ծրագիր է առաջարկում հաշմանդամ զինծառայողներին աշխատանքով ապահովելու համար: «Այն տղաները, որոնք ծառայել են բանակում և պրոբլեմներ ունեն՝ վիրավոր են եղել, հիմա հաշմանդամ են, այդ մարդկանց չի կարելի մոռանալ: Նրանք երիտասարդ մարդիկ են, չեն կարող 60 տարի թոշակ ստանալ, պետք է իրենց հետ բերենք կյանք: Այն մարդը, որ անդամալույծ է կամ պրոբլեմներ ունի, հաստատ մի տաղանդ ունի: Պետք է գտնել, փորձել, օգնել, օգտագործել, սովորեցնել և ներգրավվել ու աշխատանք տալ»:

Սարգսյանը կոչ արեց լրագրողներին՝ գործարարներին հարցնել, թե նրանք ի՞նչ են արել այդպիսի անձանց համար. «Եթե դու գործարար մարդ ես, ունես 100 աշխատող, գոնե մեկ հոգու կարո՞ղ ես աշխատանքի վերցնել: Ես ոգեշնչելու եմ մարդկանց, որպեսզի անեն այդ ծրագիրը, հանդիպելու եմ ընկերությունների ղեկավարների հետ, նրանց քաջալերելու եմ, խնդրեմ, որ դա անեն»: