Դավիթ Բաբայանը հրատարակել է «Արցախա-ադրբեջանական հակամարտության հիդրոքաղաքականությունը» աշխատությունը

Լրագրող, տարածաշրջանային և միջէթնիկ հակամարտությունների փորձագետ Նաիրի Հոխիկյանը ֆեյսբուքյան իր էջում գրել է. «Արցախի նախագահի տեղեկատվության գլխավոր վարչության պետ Դավիթ Բաբայանը հրատարակել է «Արցախա-ադրբեջանական հակամարտության հիդրոքաղաքականությունը» աշխատությունը, որը 21 տարվա աշխատանքներն ու վերլուծությունները ամփոփող գիրք է՝ Արցախի ջրային պաշարների, Թուրքիայի ու Ադրբեջանի կողմից դրանց յուրացման ու աշխարհաքաղաքական նպատակներով կիրառման մասին:

Հիշում եմ, դեռևս 2008-ին, երբ Արցախում ծանոթացա Դավիթի հետ, փաստարկված պատմում էր իր ուսումնասիրությունների մասին՝ շեշտելով, թե ինչքան կարևոր է, օրինակ, Քարվաճառը, քանի որ այնտեղից է սկիզբ առնում ՀՀ և Արցախի ջրային պաշարների հսկայական մասը: Նույնիսկ մեջբերեց իր և ԵԱՀԿ Մինսկի խմբի այն ժամանակվա համանախագահների հետ զրույցից մի հատված, երբ հարց է ուղղել, թե ինչ վտանգ են իրենցից ներկայացնում Թալիբան շարժման ահաբեկիչները ԱՄՆ-ի համար: Պատասխան եղել է՝ ամեն ինչից բացի՝ նաև կենսաբանական: Այստեղ էլ Դավիթն արձագանքել է, որ Քարվաճառը Ադրբեջանին հանձնելով, մենք նրանց հնարավորություն ենք տալիս թունավորել մեր ջրային պաշարների ակունքներն ու դառնալ կենսաբանական վտանգ հայկական երկու հանրապետությունների համար:

2019թ. հունվարի 31-ին իմ արդեն վաղեմի ընկեր Դավիթ Բաբայանից հրավեր ստացա մասնակցելու գրքի շնորհանդեսին:

Շնորհավորում եմ, Դավիթ ջան: Աշխատությունը ոչ միայն գիտական ու փաստագրական է, այլև քաղաքական լուրջ արժեք, որը կարող է և պետք է լինի նաև մեր դիվանագետների սեղանին»: