«Մենք գիտենք, թե ինչ է նշանակում օկուպացիան երկրի համար». Զուրաբիշվիլիի՝ Ադրբեջան այցի արդյունքները

Վրաստանի նախագահ Սալոմե Զուրաբիշվիլիի՝ նախագահի պաշտոնում Ադրբեջան առաջին այցը հագեցած էր, գրում է «Sputnik Georgia» գործակալությունը:

Այցը, գործակալության խոսքով, արդյունավետ էր. Զուրաբիշվիլին Ադրբեջանի նախագահ Իլհամ Ալիևի հետ քննարկել է տարբեր ոլորտներում երկկողմ համագործակցության խորացումը:

«Գաղտնիք չէ, որ Ադրբեջանը Վրաստանի ռազմավարական գործընկերներից է: Երկու երկրներին կապում են ոչ միայն առևտրատնտեսական կապերը, այլ նաև գլոբալ նշանակության ծրագրերը: Սակայն կան չլուծված խնդիրներ, որոնցից մեկը վրաց-ադրբեջանական սահմանին դեմարկացիա-դելիմիտացիայի հարցն է: Մոտ 30%-ն է»,- նշում է գործակալությունը:

Վրաստանի և Ադրբեջանի նախագահները հատուկ ուշադրություն են դարձրել էներգետիկայի և տրանսպորտի ոլորտում համագործակցությանը, ինչպես նաև Թուրքիայի հետ համատեղ ծրագրերին:

«Եթե նայենք պատմությանը, ապա կտեսնենք, որ Բաքու-Սուփսա նավթամուղի կառուցումը դեռևս 1990-ական թթ. մեծ իրադարձություն դարձավ: Այն թույլ տվեց նավթամուղով կապել Կասպից և Սև ծովերը: Դրանից հետո կառուցվեցին Բաքու-Թբիլիսի-Ջեյհան, Բաքու-Թբիլիսի-Էրզրում նավթա- և գազամուղները: Մենք՝ Ադրբեջանը, Վրաստանն ու Թուրքիան կյանքի կոչեցինք այդ ծրագրերը»,- ասել է Ալիևը:

Զուրաբիշվիլին հույս է հայտնել, որ Ադրբեջանից զբոսաշրջիկների հոսքը կավելանա: «Կարծիքներ փոխանակեցինք նաև զբոսաշրջության զարգացման մասին: Անհրաժեշտ է զարգացնել նաև այդ ոլորտը»,- ասել է նա:

Գործակալությունը գրում է նաև, որ հանդիպման ընթացքում երկու կողմերը ջերմ խոսքեր են շռայլել:

«Մեր ժողովուրդները դարերով միասին են եղել: Մենք ապրել ենք եղբայրության և բարեկամության պայմաններում: Եվ այսօր այդ կապերը մեր միջպետական կապերի հիմնական գործոններից են: Մենք մեր հարաբերությունները կառուցում ենք այդ հիմքով»,- համատեղ մամուլի ասուլիսի ժամանակ ասել է Զուրաբիշվիլին:

Զուրաբիշվիլին անդրադարձել է նաև վրաց-ադրբեջանական սահմանին դեմարկացիա-դելիմիտացիայի հարցին՝ նշելով, որ Ադրբեջանի հետ Վրաստանն ունի ընդհանուր 446 կմ երկարությամբ սահման, որի մեկ երրորդը դեռևս դելիմիտացված չէ:

Ադրբեջանական լրատվամիջոցները գրում են, որ այցի ընթացքում Վրաստանի նախագահն իրեն դրսևորել է որպես փորձառու քաղաքական գործիչ՝ խոսելով տարածքային ամբողջականության խնդրի մասին:

Զուրաբիշվիլին աղմկահարույց հայտարարություն է արել՝ ասելով.

«Վերջին տարիներին մեր երկրները միանման ողբերգությունների միջով են անցել: Մենք այսօր զգում ենք, թե ինչ է նշանակում օկուպացիան երկրի համար, երբ քո տարածքային ամբողջականությունը խաթարված է: Օկուպացիոն գծերը բաց վերքեր են մեզ համար, որոնք իրենց հերթին խոչընդոտում են մեր զարգացմանը: Այդուամենայնիվ, չնայած այդ ողբերգություններին, մենք կարողացել ենք ամրապնդվել և զարգացնել մեր տնտեսությունները՝ որպես անկախ երկիր մեր ճանապարհը շարունակելու համար»:

Ադրբեջանական լրատվամիջոցների խոսքով՝ Վրաստանի նախագահը «լավ գիտի միջազգային իրավունքն ու հստակ հասկանում է դրա կարևորությունը»:

Զուրաբիշվիլիի՝ Ադրբեջան այցն ավարտվել է պաշտոնական ընթրիքով: «Մեր գործընկերությունը կամրապնդվի և կխորանա բոլոր ուղղություններով: Մենք պետք է ուժեղացնենք միմյանց, ինչը հիմք կհանդիսանա ողջ տարածաշրջանի և մեր քաղաքացիների բարեկեցության համար»,- եզրափակել է Վրաստանի նախագահ Սալոմե Զուրաբիշվիլին:

Նշենք, որ Զուրաբիշվիլին երկօրյա պաշտոնական այց կկատարի Հայաստան: Այցելությունը նախատեսված է մարտին, սակայն մանրամասները դեռևս հայտնի չեն: