«Անհրաժեշտ է շատ արագ կասեցնել Հայաստանի ու Արցախի միջև խորացող անվստահությունը». Նորայր Նորիկյան

Փաստաբան Նորայր Նորիկյանը ֆեյսբուքյան իր էջում գրել է. «Կոպիտ ու սխալ հաշվարկ էր Արցախի նախագահին դնել այսպիսի ծանր իրավիճակի մեջ... Հայաստանի Ազգային անվտանգության ռազմավարության համաձայն՝ Հայաստանի ազգային անվտանգության առանցքային խնդիրն է Լեռնային Ղարաբաղի հակամարտության կարգավորումը: Այդ կարևորագույն փաստաթղթով Հայաստանն իրեն համարում է Արցախի բնակչության անվտանգության երաշխավորը: Վերը նշված ձևակերպումները բավական են հասկանալու համար, թե ինչ նշանակություն ունի Արցախը և նրա բնակչությունը Հայաստանի և հայ ժողովրդի համար: Արցախը մեր հայրենիքն է և վերջ: Ինձ բոլորովին այլ բան է մտահոգում: Արդեն բացահայտ ուղղակի և անուղղակի կերպով ճնշում է գործադրվում Երևանում տեղի ունեցող գործընթացների վրա՝ շատ լավ հասկանալով, որ մենք չափից դուրս զգայուն ենք Արցախի նկատմամբ: Ժողովու՛րդ, Ռոբերտ Քոչարյանն Արցախը չէ, և նրա նկատմամբ իրականացվող քրեական հետապնդումն էլ չի կարող դիտարկվել որպես վերաբերմունք Արցախի նկատմամբ: Ուզենք, թե չուզենք՝ Արցախի գործող ու նախկին նախագահների միջնորդությունները ոչ միայն ծանրակշիռ են և տեղավորվում են նաև բարոյական հարթության վրա, այլև ուղղակի քաղաքական ժեստ ու կոնկրետ վերաբերմունքի դրսևորման ձև են Մարտի 1-ի քրեական գործի նկատմամբ: Միայն պատկերացնել կարելի է, թե ինչ արձագանք կստանա և ինչպիսի հետևանքներ կունենա, եթե դատարանը հարգի նախագահների դիմումը, և Ռոբերտ Քոչարյանն անձնական երաշխավորությամբ հայտնվի ազատության մեջ: Բայց մի պահ էլ պատկերացրեք դատարանի դահլիճից գլխիկոր ու մերժված հեռացող Արցախի նախագահին… Կոպիտ ու սխալ հաշվարկ էր Արցախի նախագահին դնել այսպիսի ծանր իրավիճակի մեջ: Անհրաժեշտ է շատ արագ կասեցնել Հայաստանի ու Արցախի միջև խորացող անվստահությունը: Գոնե իմ կարծիքով Արցախի նկատմամբ ունեցած վերը նշված մանդատը լիարժեք հնարավորություն է տալիս Հայաստանին ուղղակիորեն միջամտելու և պարզապես ցրելու Արցախում խմորվող որոշակի մթնոլորտը»: