Մանվել Գրիգորյանի նկատմամբ նոր բժշկական փորձաքննություն նշանակելու միջնորդություն ներկայացվեց. նիստը հետաձգվեց

Երևանի ընդհանուր իրավասության դատարանի Կենտրոնի նստավայրում ԱԺ նախկին պատգամավոր Մանվել Գրիգորյանի և կրա կնոջ՝ Նազիկ Ամիրյանի գործով դատական նիստի ժամանակ լարված իրավիճակ ստեղծվեց մեղադրող և պաշտպանական կողմի միջև։

Մեղադրող կողմը միջնորդություն ներկայացրեց նոր բժշկական փորձաքննություն նշանակել, որի արդյունքում կպարզվի՝ ինչ հիվանդություններ ունի Գրիգորյանը, կալանքը արդյոք համատեղելի՞ է կյանքի հետ, թե՝ ոչ։ Ինչին ի պատասխան՝ պաշտպանական կողմը նշեց, որ իրավաչափ չեն համարում այս փուլում նման միջնորդությունը:

Դատախազն էլ հակադարձեց, որ միջնորդությունը Մանվել Գրիգորյանի շահերից է բխում, և պաշտպանական կողմը չի «ֆայմել» նման միջնորդություն ներկայացնել: Ինչն էլ արդյունք դարձավ վեճի:

Նիստը նախագահող դատավոր Մնացական Մարտիրոսյանը հորդորեց երկու կողմին անհարկի լարվածություն չստեղծել:

Գրիգորյանի պաշտպան Լևոն Բաղդասարյանը հայտարարեց, որ առանց Մանվել Գրիգորյանի ներկայության դատարանը չի կարող քննության առնել վերոնշյալ միջնորդությունը:

Միջնորդության քննարկումը հետաձգվեց: Հաջորդ նիստը կկայանա հունիսի 25-ին՝ ժամը 12:00-ին: