«Հայաստանը պետք է պատրաստվի Արցախի անկախության ճանաչմանը». Արման Բաբաջանյան

ԱԺ «Լուսավոր Հայաստան» խմբակցության պատգամավոր Արման Բաբաջանյանը ֆեյսբուքյան իր էջում գրել է. «Արցախյան կարգավորման բանակցային գործընթացին ուղեկցող վերջին մտահոգիչ զարգացումներն ու նախօրեին Ալիևի սպառնալից հայտարարությունը մեր երկրի արտաքին քաղաքականությունը լրջորեն վերատեսության ենթարկելու անհրաժեշտության առաջ են կանգնեցրել։

Պաշտոնական Երևանը պետք է ձեռնամուխ լինի Արցախի հետ ռազմական փոխօգնության պայմանագրի մշակման աշխատանքներին, որի մեկնարկի մասին ՀՀ ԱԳՆ-ը հայտարարում էր դեռև ապրիլյան պատերազմի առաջին օրերին։

Ավելի առաջ գնալով, Հայաստանը պետք է պատրաստվի Արցախի անկախության ճանաչմանը։ Արցախի անկախության ճանաչումը վաղուց արդեն Հայաստանի համար պետք է լինի ոչ թե ինչ-որ բանի հետքերով գնալու գործիք, այլ տարածաշրջանում հենց նոր իրավիճակ, Հայաստանի նժարին նոր կշիռ և նշանակություն հաղորդելու միջոց:

Հայաստանին իսկապես պետք է որակապես, բովանդակային և նաև գաղափարական առումով լիովին նոր արտաքին քաղաքականություն: Այստեղ, թերևս, քննարկելու հարց էլ չկա: Պետք է քննարկվեն նոր գաղափարները, հարևանների հետ փոխհարաբերության նոր մտահղացումները, Հայաստանի ռեգիոնալ և նաև համաշխարհային դերի շուրջ սխեմատիկ առաջարկները: Մինչդեռ դրանք չկան, որ հետո էլ քննարկում լինի:

Հայաստանում արտաքին քաղաքականության ընդդիմախոսությունը՝ ինչպես, թերևս, ընդհանրապես քաղաքական ընդդիմախոսությունն ամբողջությամբ, ամփոփվում է այս ԲԱՆԸ այլ ԿԵՐՊ անելու տրամաբանության մեջ, իսկ ահա ԱՅԼ բան անելու տրամաբանության առումով հիմնականում կա՛մ խորհրդավոր, կա՛մ ոչինչ չասող լռություն է»: