«Մանվել Գրիգորյանի մերձավորներին պատկանող 2 ընկերությունների գործունեությունը կասեցված է». փաստաբան

Այսօրվա դատական նիստից հետո Մանվել Գրիգորյանի պաշտպան Լևոն Բաղդասարյանը լրագրողների հետ զրույցում նշեց, որ այսօր նիստին ներկայացված երկու ընկերությունները, որոնց հաշիվների վրա արգելանք է դրված, պատկանում են Մանվել Գրիգորյանի մերձավոր ազգականներին:

Գույքը կալանքի տակ դնելու հետևանքով նրա հարազատներին և մերձավորներին պատկանող այդ ընկերությունների գործունեությունը կասեցվել է։ Բաղդասարյանի խոսքով՝ արգելանքի արդյունքում պարալիզացվել է ընկերության աշխատանքը, կասեցվել է նրա գործունեությունը, արդյունքում չեն կարողանում վճարել առաջացած հարկային պարտավորությունները, աշխատակիցների աշխատավարձերը, սպասարկման կումունալ վարձերը և այդպես ընկերությունը վնասներ է կրում։

«Տվյալ դեպքում ոչ միայն արգելանքի տակ են այդ գույքերը, այլև դրանց հաշիվները, և ընկերությունները չեն կարողանում ֆինանսական տարրական շարժ կատարել»,-ասաց Բաղդասարայնը:

Այսօր դատավորը պաշտպանական կողմին խնդրել էր հաջորդ դատական նիստին ապահովել միջազգային այն փորձագետների ներկայությունը, որոնց պաշտպանները ցանկանում են ներգրավել միջգերատեսչական հանձնաժողովային փորձաքննության կազմում։

Պաշտպանը լրագրողների հետ զրույցում նշեց նաև, որ միջազգային փորձագետներին կտեղեկացնեն, և եթե հարմար լինի, ապա հաջորդ նիստին նրանք կներկայանան։