«Քանի այդ բաժանարար գիծը քաշած չէ, չինովնիկները մտածելու են նախորդ կոռուպցիոն ժամանակների վերադարձի մասին». Լևոն Գալստյան

Բնապահպան Լևոն Գալստյանը ֆեյսբուքյան իր էջում գրել է. «Այսօր մեր վարչապետ Նիկոլ Փաշինյանը հայտնեց, որ ինստիտուցիոնալ կաթվածահար վիճակ է եղել պետական կառավարման համակարգում մերժվածների ժամանակ, և դա գաղտնի հաշվետվության մեջ գրված է եղել դեռ 2014-ին։ Նշեց, որ այդ համակարգի պահող միակ ուժը՝ դա համակարգային կոռուպցիան է եղել։ Բայց, ցավոք, կրկին չուզեց, որպես վարչապետ, հստակ քաղաքական գնահատական տալ այդ համակարգին և բաժանարար գիծ քաշել նախորդ ու ներկա համակարգերի միջև։ Քանի դեռ այդ բաժանարար գիծը քաշած չէ, և գնահատականները հստակ տրված չեն, ներկա կառավարման համակարգը շարունակելու է մնալ նախորդների տրամաբանական շարունակության մեջ, և չինովնիկները հոգու խորքում մտածելու են նախորդ երանելի կոռուպցիոն ժամանակների վերադարձի մասին։ Հիշենք, որ նույն վարչապետի խոսքերով կառավարման և իրավապահ մարմիններում դերակատարների 90%-ը դեռ հնից մնացած ժառանգությունն է։ Իսկ այդ համակարգը, ժամանակի ընթացքում, կարող է կուլ տալ ցանկացած նոր կադրի՝ որքան էլ ուզում է նա լինի հեղափոխական»։