«Թող իրենց պապայի տեղ չդնեն՝ որոշեն, թե ով ունի իրավունք առաջադրվելու». Արայիկ Հարությունյան

Արցախի «Ազատ Հայրենիք» կուսակցության նախագահ Արայիկ Հարությունյանը վստահ է, որ 2020-ին կայանալիք նախագահական ընտրությունները կանցնեն թափանցիկ և ժողորդավարական մթնոլորտում:

«Ես չեմ կիսում այն միտքը, որ որոշ քաղաքական «գործիչներ» և իրական գործիչներ հայտարարում են, թե Արցախում պետք է լինի միասնական թեկնածու: Թե Արցախում ինչ իշխանություն է ձևավորվելու, որոշելու է ժողովուրդը: Իսկ այդ մարդկանց խորհուրդ եմ տալիս զբաղվել քաղաքականությամբ և ներկայացնել ծրագիր: Թող իրենց պապայի տեղ չդնեն՝ որոշեն, թե ով ունի իրավունք առաջադրվելու: Այսօր ես հայտարարում եմ, որ «Ազատ հայրենիքը» դեմ է միասնական թեկնածուին»,- այսօր լրագրողների հետ զրույցում ասաց Հարությունյանը:

Նա նշեց, որ համաձայն չէ այն տեսակետին, թե Արցախի գործող նախագահ Բակո Սահակյանը պետք է հրաժարական տա և նրա փոխարեն անկախ, չկաշկանդված մեկը կազմակերպի Արցախի Հանրապետությունում նախագահական ընտրությունները:

«Համոզված եմ, որ գիտակցությունը մեր բոլորի, այդ թվում Սամվել Բաբայանի, այնքան բարձր պետք է լինի, որ թույլ չտանք երկրում լինի պառակտում և ընդվզում: Ամեն ինչ պետք է լուծվի կլոր սեղանի շուրջ: Բակո Սահակյանը երաշխավորում է Սահմանադրությունը և օրենքները: Նա՝ որպես երկրի առաջնորդ, պետք է ապահովի օրենքի կիրառումը: Իսկ այն անձը կամ այն ուժերը, որոնք կխանգարեն, պատասխանատվություն կկրեն ժողովրդի և օրենքի առաջ»,- հայատարարեց Ա. Հարությունյանը: