«Հարցերը շատ են, պատասխաններ չկան». Ստյոպա Սաֆարյան

Քաղաքագետ Ստյոպա Սաֆարյանը սոցկայքի իր էջում գրել է. «Արցախի նախկին ՄԻՊ, այժմ փաստաբան հարգելի Ռուբեն Մելիքյանը, որ նախաձեռնեց դատավոր Դավիթ Գրիգորյանին 101 փաստաբանների աջակցությունը, միացել է մեկ այլ հարգելի իրավաբան ընկերոջ՝ Արթուր Ղազինյանի հանցագործության մասին հաղորդմանը, որպեսզի քրգործ հարուցվի BBC-ի թղթակցի՝ մարտի 1-ի գործի քննված (ոչ թե այս պահին քննվող մասով) գործի հասանելիություն ապահովելու կապակցությամբ։ Իրավաբանների դատին եմ թողնում, թե որքանով են նախաքննության գաղտնիք համարվում արդեն իսկ քննված, դատարան ուղարկված գործի նյութերը, երբ նախաքննությունն ավարտված է, ու այնտեղ ոչինչ այլևս չի կարող նախաքննական գաղտնիք համարվել, հատկապես երբ դատարան ուղարկելն, ինքնին, արդեն գործը նաև հրապարակայնեցման հանձնել է նշանակում։ Բայց ինձ համար էականը հետևյալն է․ Ռուբեն Մելիքյանը փաստաբանական պաշտպանության ակցիա իրականացրեց մի դատավորի նկատմամբ, ով օրենքի բացահայտ խախտումով կասեցրեց մարտի 1-ի քննված գործի (որից և BBC-ի հայազգի թղթակիցը օգտվել է) դատաքննությունը, որտեղ պետք է հրապարակվեին թե՛ մեղադրական եզրակացությունը, թե՛ ցուցմունքները։ Կարո՞ղ ենք ենթադրել, որ հարգելի իրավաբանները դեմ են ընդհանրապես այդ գործի նյութերի երբևէ՝ դատարանում ու ԶԼՄ-ներում հրապարակմանը։ Կարծես թե այդպես է ստացվում․․․․ Եվ ինչո՞ւ է ամեն ինչ, ինչ արել կամ անում են, ուղղակի թե անուղղակի ուղղված է գործի նյութերի հրապարակայնացման դեմ․․․ Ինչո՞ւ հենց պահանջ չի ձևակերպվում արագացնել գործի դատաքննությունը, երբ այլևս ԶԼմ-ները չեն դառնա նյութերի հրապարակայնացնողը, այյլ հենց դատարանը, ու պարզ կդառնա՝ BBC-ի հրապարակածը համընկնո՞ւմ է գործի նյութերի ու դրա շրջանակներում ձեռք բերված ապացույցների հետ, թե՞ իսկապես միտումնավոր աղավաղում կա․․․ Հարցերը շատ են, պատասխաններ՝ չկան․․․»։