«Նման քաղաքականությունը տնտեսական, անվտանգային բազմաթիվ խնդիրներ է առաջացնում». Հայկ Խանումյան

Արցախի ԱԺ ընդդիմադիր պատգամավոր Հայկ Խանումյանը ֆեյսբուքյան իր էջում գրել է. «Դահրավ գյուղը Ստեփանակերտից հեռու է 19 կմ, Արցախի հյուսիս-հարավ մայրուղուց 2-3 կմ: Դպրոցում սովորում է 8 աշակերտ, նրանց դասավանդում են 14 ուսուցիչ: Ստեփանակերտում գերբնակեցում է, սեփական տների նկուղներն անգամ դառնում են վարձով բնակարան: Կառավարությունը բանակի և բյուջեի բնակարանաշինության գումարների զգալի մասն ուղղում է Ստեփանակերտին: Նման քաղաքականությունը տնտեսական, անվտանգային բազմաթիվ խնդիրներ է առաջացնում: Ակնհայտ է, որ Արցախում հիմնական որոշում ընդունողները ոչ կոմպետենտ են:

Երևանը 2,9 միլիարդ լրացուցիչ գումար է տվել թոշակի անցած սպաների բնակարանային հարցի լուծման համար: Այդ գումարները պետք է ծախսվեն Դահրավում և Դահրավի նման գյուղերում բնակարանների կառուցման համար: Պետությունը պետք է հոգա մինչև գյուղ տանող ճանապարհների ասֆալտապատումը: Դահրավի դպրոցը պետք է կրկին հարյուրավոր աշակերտներ ունենա, տրանսպորտն աշխատի ոչ թե շաբաթը երկու անգամ, այլ օրը 4-5 անգամ, բնակչության տեղաբաշխումն էլ մի քիչ դիվերսիֆիկացվի: Դահրավի փոխարեն կարող եք հասկանալ Դաշուշեն, Շոշ, Սարուշեն, Խնածախ, Հովսեփավան, Իվանյան, Լուսաձոր, Աստղաշեն, Խանցք, Պատարա և ստեփանակերտամերձ այլ փոքրիկ գյուղեր»: