Արմեն Գևորգյանը դատական հայց է ներկայացրել ընդդեմ «Իմ քայլի» պատգամավորի

Ազգային անվտանգության խորհրդի նախկին քարտուղար Արմեն Գևորգյանը դատական հայց է ներկայացրել՝ ընդդեմ «Իմ քայլը» խմբակցության պատգամավոր Արուսյակ Ջուլհակյանի և փաստաբան Մուշեղ Շուշանյանի։ Այդ մասին տեղեկանում ենք DATALEX տեղեկատվական կայքից:

Հայցվոր Արմեն Գևորգյանը պահանջում է դատարանից արձանագրել իր անմեղության կանխավարկածի խախտումը, պարտավորեցնել պատասխանողին՝ հերքել վիրավորանք և զրպարտություն համարվող տեղեկությունները, հրապարակային ներողություն խնդրել և փոխհատուցում տրամադրել։

Գործը մակագրվել է Երևան քաղաքի դատարանի դատավոր Արթուր Ստեփանյանին:

Հիշեցնենք՝ օգոստոսի 7-ին Ջուլհակյանն ու Շուշանյանը մամուլի ասուլիս են տվել՝ ՄԻԵԴ որոշման վերաբերյալ, որով ՀՀ-ն պարտավորվում է սեփականությունից զրկված Յուրի Վարդանյանին 1 մլն 600 հազար եվրո վճարել: Ջուլհակյանը նշել էր, որ ամեն ինչը իրականացվել է նախագահի աշխատակազմի ղեկավար Արմեն Գևորգյանի կոորդինացիայի ներքո: Շուշանյանն էլ նշել էր, որ Կենտրոնի բնակիչների սեփականության իրավունքի զանգվածային խախտումների գործընթացին ներգրաված է եղել այն ժամանակվա պետության բարձրագույն իշխանությունը, կոնկրետ Ռոբերտ Քոչարյանի աշխատակազմը: