«Այս դեպքից հետո պատկան մարմինները կարևորագույն վկաներին պետք է վերցնեն պետական պաշտպանության տակ». Անդրանիկ Քոչարյան

Այսօր համացանցում լուրեր տարածվեցին, որ ՀՀ ոստիկանության նախկին պետ Հայկ Հարությունյանին ճնշել են, որ վերջինը «Մարտի 1»-ի գործով ցուցմունք տա սահմանադրական կարգը տապալելու մեջ մեղադրվող, ՀՀ երկրորդ նախագահ Ռոբերտ Քոչարյանի դեմ: Այս առնչությամբ այսօր Հանրային հեռուստաընկերության եթերում ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանն ասել է. «Սա շատ ընդգծված, կանխամտածված լրատվական արտահոսք է: Սա ոչ միայն քարոզչություն է, այլև՝ ուղղորդում: Եթե դրա նպատակն այն է, որ Քոչարյանի պաշտպանական թիմը դրանից օգտվի, ապա շատ անհաջող էր, և նույն այդ ուղղորդման մեջ ներգրավված լրատվամիջոցը պարտավոր է նախաքննական մարմնին տեղյակ պահել, թե այդ տեղեկատվությունն իրեն որտեղից»:

Եթերի ընթացքում Քոչարյանը նշեց, որ Հայկ Հարությունյանն այն պաշտոնյան էր, որը քաղաքական ղեկավարության որոշումները չքննարկելով, կատարում էր. «Դա կարող էր նաև հետևանք թողնել իր ամբողջ կյանքի վրա: Այդ ներշնչանքները կարող էին անընդհատ ուղղորդել իրեն իր գիտակցված ամբողջ կյանքի ուղու վրա»,- ասաց նա:

Անդրանիկ Քոչարյանը նաև նշեց, որ այս դեպքից հետո պատկան մարմինները պետք է ավելի ուշադիր լինեն և «Մարտի 1»-ի գործով կարևորագույն վկաներին վերցնեն պետական պաշտպանության տակ:

Մանրամասները՝ տեսանյութում: