«Մնում է մեր պայմանավորվածություններն իրականացվեն». ՀՀ վարչապետ

«Դա ընդունված պրակտիկա է, երբ ղեկավարները միասին պետք է միջոցառման մասնակցեն, միևնույն տրանսպորտային միջոցով են տեղաշարժվում, արտառոց ոչ մի բան տեղի չի ունեցել... Ինչ վերաբերում է սելֆիին, պատմելու ի՞նչ կա, նկարվել ենք»,- խորհրդարանում ասաց ՀՀ վարչապետ Նիկոլ Փաշինյանը՝ անդրադառնալով ԵԱՏՄ երկրների ղեկավարների հետ միկրոավտոբուսում սելֆիին: Հարցին՝ իսկ որտե՞ղ էր Բելառուսի նախագահը, Փաշինյանն ասաց. «Բելառուսի նախագահ պարոն Լուկաշենկոյի ընտանիքում, ցավոք, դժբախտություն էր պատահել օրեր առաջ, նա պետք է մասնակցեր սգո արարողություններին: Ինչ վերաբերում է մեր երկկողմ հարաբերություններին, մեր բոլոր գործընկերների հետ մեր հարաբերություններն այս հանդիպումների ընթացքում նոր լիցք կստանան: ՌԴ նախագահի հետ երկու հանդիպում եմ ունեցել, մոտ երեք ժամ քննարկել ենք մեր հարաբերությունների ամբողջ ծավալը: Գոհ ենք, մնում է մեր պայմանավորվածությունները կառավարություններն ու քաղաքական թիմերը հետևողականորեն իրականացնեն»: