«Հայտարարություն անելուց առաջ հարցրե՞լ եք տանտիրոջը` արցախցուն». Լուսինե Հարոյան

«Համահայկական Ազգային Համաձայնության» համանախագահ Լուսինե Հարոյանը ֆեյսբուքյան իր էջում գրել է. «Աննա Հակոբյանը Մեհրիբան Ալիևային հրավիրել է Արցախ մուղամ լսելու, վերջում էլ չի մոռացել ավելացնել, որ դա բարի կամքի դրսևորում է, որ արցախցին հյուրասեր ժողովուրդ է ու ինքն էլ էնքան «հայրենասեր», որ Ալիևային հնարավորություն է տալիս մուղամ լսել Արցախում միայն խաղաղության հաստատման դեպքում, այլ ոչ թե պատերազմի:

Սույն տիկինը կարծես՝ ուզում է մրցել իր ամուսնու հետ անադեկվատությամբ:

Տիկին, իսկ նման հայտարարություն անելուց առաջ դուք հարցրե՞լ եք տանտիրոջը՝ արցախցուն, նա ուզո՞ւմ է հյուրընկալել Ալիևային, թե՞ գիտեք Արցախը ձեր կառավարական առանձնատունն է:

Դուք հարցրե՞լ եք սահմանում կանգնած զինվորների մայրերին՝ նրանք պատրա՞ստ են հյուրընկալել մեկին, որն ամեն օր սպանում է իրենց երեխաներին, զավակ կորցրած մայրերին, որոնց համար աշխարհն այլևս սև է: Դուք հարցրե՞լ եք մեզ՝ մենք պատրա՞ստ ենք հյուրընկալել մեկին, որն ամեն օր գողանում է մեր պատմությունն ու մշակույթը և հայտարարում, որ մենք ապրելու արժանի չենք:

Ճիշտ է, արցախցին շատ հյուրընկալ է, բայց հաստատ այն աստիճան անգիտակից ու ուխտադրուժ չէ, Պետրոս Գետադարձի նման, որ Անի մայրաքաղաքի դարպասները բացի թշնամու առաջ, դուք էլ հանդիսավորությամբ բանալիներ հանձնեք: Տիկին, կլինի՞ հանգիստ նստեք տեղներդ»: