Վարժական հավաքներից խուսափելու համար քրեական, զորավարժություններից խուսափելու համար՝ վարչական պատիժ

339

Հինգշաբթի, 26 դեկտեմբերի, 2019 թ., 16:15

ԱԺ Պաշտպանության և անվտանգության հարցերի մշտական հանձնաժողովը դեկտեմբերի 26-ի նիստում քննարկեց և հավանություն տվեց «Վարչական իրավախախտումների վերաբերյալ» Քրեական օրենսգրքում փոփոխություններ կատարելու օրինագծին: Դրանով հստակություններ են մտցվում վարժական հավաքներից, զորահավաքից, զորավարժություններից խուսափելու համար պատիժներում: Պաշտպանության փոխնախարար Գաբրիել Բալայանն օրենսդրական փոփոխության անհրաժեշտությունն այսպես հիմնավորեց. «Նախկինում խառնաշփոթ է եղել, նախատեսված է եղել թե՛ վարչական, թե՛ քրեական պատիժ: Բացի այդ, հստակեցված չէր, թե ո՞ր մարմինն է վարչական վարույթն իրականացնելու և տուգանելու:

Փոփոխությամբ առաջարկվում է վարժական հավաքներից խուսափելու համար սահմանել քրեական պատիժ: Նշենք, որ վարժական հավաքը հայտարարվում է կառավարության որոշմամբ:

Իսկ զորավարժություններից խուսափելու համար առաջարկվում է վարչական պատիժ՝ նվազագույն աշխատավարձի 30-ապատիկի չափով՝ նախկին 20 հազարապատիկի փոխարեն: Նշենք, որ զորավարժությունները հայտարարվում են պաշտպանության նախարարի հրամանով: