«Քննությամբ կհաստատվեն՝ տվյալները նախաքննության փուլո՞ւմ են հրապարակվել, թե՞ մինչ այդ». դատախազ Պետրոս Պետրոսյան

Վերաքննիչ դատարանի փետրվարի 3-ի նիստում Առաջին ատյանի դատարանի կայացրած վճռի դեմ դատախազ Պետրոս Պետրոսյանի բողոքի քննության ժամանակ Ռ. Քոչարյանի պաշտպան Հովհաննես Խուդոյանը հայտարարեց, որ պաշտպաններին տրամադրվել են մեղադրյալների մեղքն ապացուցող տվյալներ: Այդ մասին նշել է նաև ինքը՝ քննիչը:

Դատական նիստից հետո լրագրողների հետ զրույցում այս պնդմանը հակադարձեց դատախազ Պ. Պետրոսյանը: Նա ասաց, թե քննիչը նման ձևակերպմամբ պնդում չի արել: Հ. Խուդոյանն էլ իր հերթին հաստատեց. «Քննիչի որոշումը ես հրապարակել եմ, այնտեղ բառացի գրված է. «Գործով առանձնացվել են մեղադրյալներին վերաբերող, նրանց մեղավորությունն ապացուցող բոլոր տվյալները»»,- նշեց նա:

Արդյոք հնարավոր չէ՞ վերոնշյալ նյութերի տրամադրումն ու հրապարակումը կատարել դռնփակ նիստում, իրենց ուղղված այս հարցին ի պատասպան կողմերից մեկը՝ դատախազ Պ. Պետրոսյանը նկատեց. «Տվյալ պարագայում Քրեական դատավարության օրենսդրությունը հստակ չափանիշներ է նախատեսում: Քրեական գործի նյութերն ամբողջությամբ, թե մասնակի դարձնել-չդարձնեը նախաքննության մի փուլ է, որտեղ ծանոթացման ընթացակարգ ընդհանրապես չկա»: Մյուս կողմը՝ պաշտպան Հ. Խուդոյանը կրկին պնդեց, որ տվյալները կարող են հրապարակվել դռնփակ նիստում՝ դրանք չհրապարակելու վերաբերյալ ստորագրություն տալու պայմանով: Սակայն, ինչպես նկատեց պաշտպանը, այն, որ հրաժարվում են իրենց տվյալները տրամադրել, խորացնում է կասկածն առ այն, որ այնտեղ կարող են լինել հանգամանքներ, որոնք իրենց պաշտպանյալի օգտին են:

Պաշտպանի այն պնդմանը, թե որոշ տվյալներ հայտնվել են մամուլում, դատախազ Պ. Պետրոսյանն ասաց. «Ինչ վերաբերում է նախաքննական որոշ տվյալներ մամուլում հայտնվելու հանգամանքին, ապա դրանք քննության առարկա են: Քննությամբ կհաստատվեն՝ դրանք նախաքննության փուլո՞ւմ են հրապարակվել, թե՞ մինչ այդ»: