Ոստիկանությունը՝ Գևորգ Կոստանյանի հետախուզման արդյունքների մասին

Փետրվարի 3-ին ՀՀ նախկին գլխավոր դատախազ Գևորգ Կոստանյանը հայտարարել է, որ պատրաստ է վաղն ևեթ վերադառնալ և հրապարակային պատասխանել նախաքննական մարմնի բոլոր հարցերին: Ավելի վաղ Գ. Կոստանյանը նշել էր, թե ՀՀ իրավապահ մարմինների քննիչներին է տրամադրել իր ռուսաստանյան հասցեն, հեռախոսահամարը: Եվ ուրեմն՝ այս պարագայում ի՞նչ միջոցներ է ձեռնարկել ՀՀ ոստիկանությունը հետախուզման մեջ գտնվող նախկին գլխավոր դատախազին ՀՀ վերադարձնելու համար:

MAMUL.am-ն այս հարցով դիմեց ՀՀ ոստիկանության հասարակայնության հետ կապի և լրատվության վարչությանը: Պատասխանը հակիրճ էր. «Ոստիկանությունը ձեռնարկում է համապատասխան միջոցներ: Դրանք հրապարակման ենթակա չեն»:

Հիշեցնենք, որ անցյալ տարվա նոյեմբերի 25-ին ՀՔԾ-ն Գ. Կոստանյանին «Մարտի 1-ի» գործով որպես մեղադրյալ ներգրավելու մասին էր հայտարարել: Նրան 48 ժամ էր տրվել՝ վարույթն իրականացնող մարմին ներկայանալու համար: 48 ժամը լրանալուց հետո ՀՔԾ-ն նրա նկատմամբ հայտարարել էր հետախուզում՝ կալանավորումը որպես խափանման միջոց ընտրելու վերաբերյալ միջնորդություն ներկայացնելով դատարան:

Նախկին գլխավոր դատախազը «Մարտի 1»-ի գործով որպես մեղադրյալ է ներգրավվել 5 հոդվածով: Ըստ մեղադրանքի՝ 2008-ի մարտի 1-ին և 2-ին Երևանում տեղի ունեցած իրադարձություններից հետո Գ. Կոստանյանը պահանջել է հետին ամսաթվով կազմել և շրջանառության մեջ դնել մարտի 1-ին և 2-ին ոստիկանության կատարած գործողությունների իրավաչափությունը հիմնավորող փաստաթղթեր: