«Անմեղության կանխավարկածի խախտումը դատարանի կողմից հաստատվելուց հետո էլ Ս. Խաչատրյանը չի հեռացվել վարույթից». Արամ Օրբելյան

ՀՀ նախկին նախագահ Ռոբերտ Քոչարյանի և մյուսների գործով փետրվարի 4-ի դատական նիստում դատարանը քննեց Ռ. Քոչարյանի, Ա. Գևորգյանի պաշտպանների միջնորդությունը՝ իրենց պաշտպանյալների հանդեպ քրեական հետապնդումը դադարեցնել և գործը կարճել:

Հիմնավորումը ներկայացրեց Արմեն Գևորգյանի պաշտպան Էրիկ Ալեքսանյանը: Որպես իրավական հիմնավորում կրկին բերվեց այն, որ 2008թ. օրենսդրության մեջ «սահմանադրական կարգի տապալում» հանցակազմը բացակայել է, ուստի իր ու իրենց գործընկերների պաշտպանյալները ենթակա չեն քրեական հետապնդման: Փաստաբանը կրկին հիշեցրեց «7-ի գործը», որով մեղադրվողների հանդեպ քրեական հետապնդումը դադարեցվել է: Միիջնորդությանը միացավ Ս. Օհանյանի պաշտպան Կարեն Մեժլումյանը:

Պաշտպան Ա. Օրբելյանը հիշեցրեց, որ դատարանը նախորդ նիստում որոշել էր բոլոր պաշտպանների միջնորդությունները լսել առանձին-առանձին. նա պահանջեց դրանք ներկայացնելու հնարավորություն տալ: Միջնորդությունն առաջինը ներկայացրեց Հովհաննես Խուդոյանը՝ անդրադառնալով նախագահի ինստիտուտի անձեռնմխելիության իրավական մեկնաբանություններին, նյութաիրավական նորմի կիրառելիության խնդրի իրավական հիմնավորումներին: Ըստ պաշտպանի՝ 2008թ. կայացած ակտը, որով Մարտի 1-ի գործով անցնողների հանդեպ քրեական հետապնդումը դադարեցվել է և քրգործը կարճվել է, իր իրավական ու օրինական ուժը չի կորցրել:

«Այսինքն՝ դատախազությունն ակնկալում է, որ ՀՀ-ում լինելու է իրար հակասող 2 դատական ակտ՝ միևնույն իրադարձությունների վերաբերյալ»:

Միջնորդության ներկայացումն ընդմիջվեց Արամ Օրբելյանի այն հայտարարությամբ, որ ՀՔԾ պետ Սասուն Խաչատրյանը պարբերաբար գործի վերաբերյալ հայտարարություններ է արել՝ խախտելով անմեղության կանխավարկածը, սակայն քրեական գործի վարույթից չի հեռացվել:

Օրբելյանը կրկին պնդեց, որ սահմանադրական կարգի տապալում հանցակազմը ապաքրեականացվել է, ուստի՝ գործը պետք է կարճվի: Մեղադրող կողմը հայտարարեց, որ իրենց հակափաստարկները կներկայացնեն բոլոր պաշտպանների միջնորդություններն ունկնդրելուց հետո: