Ի՞նչ հրահանգներ է տվել Փաշինյանը Վանեցյանին. «168 ժամ»

254

Հինգշաբթի, 06 փետրվարի, 2020 թ., 09:15

Երեկ ԱԱԾ նախկին տնօրեն Արթուր Վանեցյանը հանդիպել և զրուցել է տպագիր մամուլի խմբագիրների հետ։

Հարցին՝ Ձեր պաշտոնավարման ընթացքում վարչապետ Նիկոլ Փաշինյանի կողմից ՀՀ երկրորդ նախագահ Ռոբերտ Քոչարյանի, ՀՀ երրորդ նախագահ Սերժ Սարգսյանի, ՀՀ Սահմանադրական դատարանի նախագահ Հրայր Թովմասյանի վերաբերյալ եղե՞լ են արդյոք կոնկրետ հանձնարարականներ ինչ-որ բան գտնել և նստացնել, պատասխանել է․ «Կոնկրետ հանձնարարականներ եղել են ընդհանուր, բոլորի նկատմամբ։ Ես չեմ ուզում մասնավորեցնել․․․»։

Նա ըստ էության խուսափեց ներկայացնել իր և Փաշինյանի առանձնազրույցնենրի մանրամասները։ Ա․ Վանեցյանը հաստատեց, որ իր հրաժարականը հետևել է ՍԴ նախագահ Հրայր Թովմասյանի շուրջ տեղի ունեցող գործընթացներին։

«Այո, իմ հրաժարականը հետևել է դրան։ Կապը նա է, որ արդեն իսկ իշխանությունները չեն թաքցնում, որ իրենք չեն հանդուրժելու Հրայր Թովմասյանի սահմանադրական դատարանի նախագահ լինելու հանգամանքը։ Հիմա ես չեմ պատասխանի Ձեր հարցին՝ ինձ եղե՞լ է ուղիղ հանձնարարական, չի եղել․ ես ասում եմ, որ իմ հրաժարական ներկայացնելու հիմնական պատճառներից մեկը եղել է այս հարցում անհամաձայնությունը։ Եվ ես հնչեցրել եմ «կանգ առ»-ի սթափեցնող կոչը, որը, ցավոք սրտի, տեղ չի հասել»,- ասել է նա։

Վանեցյանն անդրադարձել է նաև Ռոբերտ Քոչարյանի գործին՝ ասելով. «Ես դա չէի կոչի՝ Ռոբերտ Քոչարյանի գործ, «Մարտի 1»-ի գործի բացահայտման մասին է խոսքը, բայց «Մարտի 1»-ի գործ ասելիս՝ հասկանում ենք, որ առաջնահերթությունը պետք է տրվեր 10 զոհված մարդկանց սպանությունների բացահայտմանը: Հիմա հարց է առաջանում՝ այսօրվա գործընթացները, քննությունը արդյոք նպաստո՞ւմ են այդ 10 զոհերի սպանության բացահայտմանը: Կարծում եմ՝ ոչ:

Ինչ վերաբերում է Ռոբերտ Քոչարյանին՝ այս հայտարարությունից հետո ես գիտեմ՝ լինելու են շատ տարբեր մեկնաբանություններ, բայց ես ուզում եմ նշել, որ Ռոբերտ Քոչարյանի խափանման միջոցը՝ կալանավորումը, ընտրված է սխալ, և նա երբևիցե որևէ իր քայլով չի ցույց տվել, թե խուսափում է քննությունից: Կարծում եմ՝ ճիշտ կլիներ՝ Ռոբերտ Քոչարյանի խափանման միջոցը վերանայվեր, դա նաև կթուլացներ լարվածությունը հասարակության որոշ հատվածներում և միայն կնպաստեր գործի լիարժեք քննությանը և բացահայտմանը, իսկ մենք՝ բոլորս, ուզում ենք, որ «Մարտի 1»-ի գործը բացահայտվի: Ես չեմ կարծում, որ կա որևէ մեկը, որը դեմ է «Մարտի 1»-ի գործի բացահայտմանը»:

Նյութն ամբողջությամբ կարող եք կարդալ թերթի այսօրվա համարում։