Դատավոր Աննա Դանիբեկյանին կրկին ինքնաբացարկի միջնորդություն ներկայացվեց

ՀՀ երկրորդ նախագահ Ռոբերտ Քոչարյանի և մյուսների գործով մարտի 3-ի նիստում դատավոր Աննա Դանիբեկյանին ինքնաբացարկի միջնորդություն հայտնեց պաշտպան Հայկ Ալումյանը: Ըստ նրա՝ այս տարվա հունվարի 9-ին ներկայացված միջնորդությունից հետո ի հայտ է եկել այնպիսի հանգամանք, որը բացառում է դատավորի մասնակցությունը տվյալ քրեական գործին: Ըստ այդմ՝ ԲԴԽ նախագահ Ռուբեն Վարդազարյանն անցյալ տարվա դեկտեմբերի 12-ի հարցազույցում ասել է, թե իշխանությունները ցանկանում են, որ մեր բոլոր դատավորները լինեն դատավոր Աննա Դանիբեկյանի նման:
«Իշխանությունները, որոնց համար Դուք ցանկալի դատավոր եք, բազմիցս և ամենահստակ կերպով արտահայտել են իրենց դիրքորոշումն այն մասին, թե ինչպես են ցանկանում տեսնել սույն գործի ընթացքը և ելքը: Անմիջապես այն բանից հետո, երբ Ռ. Քոչարյանին մեղադրանք առաջադրվեց, վարչապետը և նրա թիմակիցները, անտեսելով անմեղության կանխավարկածը և իրական փաստերը, սկսել են տարածել և մինչ այժմ տարածում են այնպիսի բովանդակությամբ տեղեկատվություն, որով պարոն Քոչարյանը ներկայացվում է իբրև հանցագործ: Վարչապետի խորհրդական Սրբուհի Ղազարյանը, իր ֆեյսբուքյան էջում տեղադրելով պարոն Քոչարյանի լուսանկարը, նշել է՝ «Օսմանյան հորդա, դու պիտի փտես բանտում, իսկ քո ընտանիքի ծփացող վայելքներով կյանքը՝ ընդհատվի»: Վարչապետի մեկ այլ խորհրդական՝ Նիկոլայ Բաղդասարյանը՝ մասնագիտությամբ փաստաբան, ֆեյսբուքյան իր էջում տեղադրել է պարոն Քոչարյանի լուսանկարը և գրել հետևյալ մեկնաբանությունը. «Ի՞նչն էր իրականում Մարտի 1-ի դեպքերի իրական պատճառը՝ ագահությունը, որ դրդում էր ամեն գնով պահել թալանածը, որն էլ դարձավ 10 զոհերի պատճառ»: Վարչապետի մեկ այլ խորհրդական՝ Արփի Դավոյանը կրկին սոցցանցի իր էջում, կիսվելով մամուլի հրապարակմամբ, գրել է. «Ոչինչ չի մոռացվում, ոչ ոք չի մոռացվում. Մարտի 1. Քոչարյանի գողացված գարունը»»:
Պաշտպանը մեջբերեց նաև վարչապետի խոսքերը՝ ուղղված դատավորներին. «Խելքներդ գլուխներդ հավաքեք, ժողովրդի հետ կատակ մի արեք»: