«Եթե աշխատակազմից պատասխանեին, էս բոլոլան չէր լինի». Մեխակ Առաքելյանը Փաշինյանին նամակ էր գրել

Կուրթանեցի 34-ամյա Մեխակ Առաքելյանն, ով Նիկոլ Փաշինյանի հետ ունեցած հանդիպումից ու նրանից ստացած հանդիմանություններից հետո դարձել է համացանցի ամենաքննարկվող անձանցից մեկը, այժմ խուսափում է լրագրողներից: MAMUL.am-ին հաջողվեց կապ հաստատել նրա հարևանի՝ Սերգեյ Դարբինյանի հետ, ով հաստատեց, որ Մեխակը, չնայած առողջական լուրջ խնդիրներին՝ միշտ էլ հնարավորությունների ներածի չափով աշխատել է: «Իր հետ շատ եմ աշխատել: Ինքն էլ, եղբայրն էլ, աշխատող տղաներ են: Մի փտած դոմիկում են ապրում, բոլորն առողջական խնդիրներ ունեն՝ ինքն էլ, եղբայրն էլ, երեխաներն էլ: Դոմիկում ապրող մարդը երբեք չի կարող առողջ լինել: Առաջ էդ դոմիկում 4 հոգով էին ապրում, հիմա՝ 10: Դե պատկերացրեք՝ ինչ դժվարություններ են տանում»:

Ըստ հարևանի՝ այս տհաճ միջադեպը չէր լինի, եթե Փաշինյանի աշխատակազմը նորմալ աշխատեր. «Դեռ 15-16 ամիս առաջ էին նամակ գրել Փաշինյանին, օգնություն խնդրել: Եթե աշխատակազմից պատասխանեին, էս բոլոլան չէր լինի: Փաշինյանն էլ մեղավոր չէ, նախատել է ընդհանուր. եթե ամեն մի կարիքավոր մարդ մոտենա, ապա կդոփենք տեղում: Մեխակը հանպատրաստից մոտեցավ վարչապետին, առաջին տպավորությունն այն էր, որ առողջ տղա է, ուստի կարող է աշխատել ու տուն ստեղծել»:

Հարցին, թե ինչու է անտուն մնացել Առաքելյանների ընտանիքը, Սերգեյը պատասխանեց. «Երկրաշարժից առաջ մեկնել են Սպիտակ, որտեղ մայրն աշխատել է, տուն պետք է ստանային, բայց շենքը կիսակառույց՝ երկրաշարժից փլվել է: Ոչ մի փաստաթուղթ չի մնացել, որի հիման վրա իրենց հնարավոր կլիներ տուն տալ: Ստիպված ետ են եկել Կուրթան, որտեղ արդեն ոչինչ չեն ունեցել»: