«Ադրբեջանում փորձ է արվում հանրությանը ցուցադրել, որ բանակում ամեն ինչ կարգին է». Կարեն Հովհաննիսյան

Քրդագետ, թուրքագետ Կարեն Հովհաննիսյանը ֆեսբուքյան իր էջում գրել է. «Երկու օր է, ադրբեջանական գեներալական վերնախավը, այդ երկրի զինված ուժերի ղեկավարի գլխավորությամբ, գտնվում է «առաջնագծում»՝ քաջալերելու զինծառայողներին: Ադրբեջանական քարոզչամեքանայի մասին շատ է խոսվել, բայց այս դեպքում ամեն ինչ հասել է գագաթնակետին: Փորձ է արվում հանրությանը ցուցադրել, որ բանակում ամեն ինչ կարգին է, որ բանակը բնականոն հունով իր գործառույթներն է իրականացնում, սակայն ստացվում է հակառակ էֆեկտը: Հասանելի աղբյուրներից ստացվող նյութերը վերլուծելով տեսնում ենք, որ այս երկու օրը գեներալական անձնակազմը ոչ մի շարքայինի, սերժանտի, զորամասային սպայական կազմի չի հանդիպում: Ամեն ինչ ընթանում է զինտեխնիկայի, բոլորովին նոր զորանոցների ֆոնին 10-12 հոգանոց շքախմբով նկարահանումներով: Գեթ մեկ զինվոր ոչ մի տեղ չի երևում, գեթ մեկ ոչ բարձրաստիճան սպա ոչ մի տեղ չի երևում, այնպիսի տպավորություն է, որ ողջ զորքին հանել են տարածքից և իրենք իրականացնում են շրջայց: Իսկ թե ինչո՞ւ եմ առաջնագիծը չակերտների մեջ գրել, քանի որ ոչ մի դիրք մինչև այս պահը չեն այցելել...»: