«Այս խորամանկ ու ծավալուն սաբոտաժը հենց այնպես չի պատահել». Լևոն Բարսեղյան

«Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը ֆեյսբուքյան իր էջում գրել է. «Տեսնես ով կիմանա՝ ինչու կարողացան հաջողել սաբոտաժը հեղափոխականների քթի տակ

Կարդացեք:

Կոռուպցիայի կանխարգելման հանձնաժողովի նախագահ Հ. Հարությունյան. «Բարեվարքության կանոնների ստուգումը և վեթինգը խիստ բովանդակային տարբերություններ ունեցող գործընթացներ են։ Վեթինգն ամբողջությամբ այլ գործողություն և գործընթաց է, որը ենթադրում է այլ գործիքակազմ, իսկ բարեվարքության ստուգումը լրիվ այլ դասակարգում ունեցող գործողություն է: Գործող դատավորների մասով իրականացվելու է գույքի եկամուտի և շահերի հայտարարագրերի ուսումնասիրություն։ Բայց դա ոչ բարեվարքություն է, ոչ առավել ևս՝ վեթինգ։ Սա այն նույն սահմանափակ հնարավորությամբ դատավորների գույքի եկամուտների և շահերի ստուգումն է՝ 2017-ից տեղի ունեցած գործարքների և եկամուտների նկատմամբ՝ ստուգման լայնածավալ գործիքների կիրառման հնարավորությամբ։ Եթե նույն դատավորը 2013-ին ձեռք է բերել որևէ գույք կամ ցույց է տվել ինչ-որ դրամական միջոց, և այդ գույքի կամ դրամական միջոցի ծագման օրինականության վերաբերյալ հարցեր կան, հանձնաժողովը սահմանափակ հնարավորություններ ունի դրանց օրինականությունը ստուգելու։ Նրա գործունեության շրջանակում դրսևորած խախտումներին հանձնաժողովն առհասարակ որևէ հասանելիություն և լիազորություն չունի։ Այդ տեսակի գործողություն չկա։ Այսինքն՝ սա վեթինգի նախագիծը չէ, պետք չէ հանրությանը թյուրիմացության մեջ գցել և ասել, որ 6 ամիս հետո բոլոր դատավորները մաքրվելու են կամ համակարգն այդ ձևով մաքրվելու է։ Նախագիծն այդ իմաստն արտահայտող գործողություններ չի նախատեսել։ ...» (ամբողջությամբ՝ առաջին մեկնաբանության մեջ եմ դնում):

Այսպիսով, բոլոր կոռումպացված և հիմա սրբի կերպարանք առած դատավորները կարող են իրար աչքալուսանք տալ, շնորհավորել, կարգին քեֆ անել, ծածուկ կամ բացահայտ: Մենք էլ էշ-էշ սպասում էինք, որ դատավորների քննազտում (վեթինգ) կամ անցումային արդարադատություն է լինելու, ինչպես խոստացել-հանձնարարել էր վարչապետը: Չէ, հարգելի հարկատու և դատական համակարգը տասնամյակներով քֆրտած քաղաքացիներ, այսպես մի թեթև նայելու են, ինչ կա-չկա դատավորների մոտ, բայց 2017-ից ի վեր: Իսկ ՄԻԵԴ-ում Հայաստանի դեմ կայացված վճիռների մեղավոր դատավորների հանգամանքը չի քննվելու, օրինակ: Ես կարծում էի, թե բոլոր գործող դատավորներին՝ իրենց պաշտոնավարման մեկնարկից ի վեր և բոլոր հավակնորդներին էն մանրակրկիտությամբ են քննելու, զննելու, որակավորելու կամ որակազերկելու, որ այլևս ոչ մի մացո-մուցո-տաթո-մաթո և այլ զարհուրելի կերպարներ տեղ չունենային դատական համակարգում: Զդրասծյե:

Փաստաբանները բոլորից լավ գիտեն, թե դատավորների քանի տոկոսն է պիտանի իրական արդարադատության համար: Այս համակարգով բոլորը մնալու են իրենց տեղերում, կամ՝ մինուս 2-3 հոգի: Կայֆ է, չէ՞: Եվ այդ քննազտման բանալին, իշխանությունը, լիազորությունը գործադիրի ու օրենսդիրի ձեռքում էին: Չուզեցին անել:

Երկար-բարակ ֆռիկներ ու ճամարտակություններ ենք լսելու, թե ինչու վարչապետի ասած անցումային արդարադատությունն ու վեթինգը չեղան, չենք իմանալու, թե ինչպես տարհամոզեցին նրան, ամենահետաքրքիրն ու ողբերգականը լինելու է նախարարության անմիջական պատասխանատուների և խորհրդարանում աշխատող իրավունքի մասնագետների կամ նախկին փաստաբանների բացատրությունները: Հետո, թե բա ՍԴ անդամների պաշտանանկման հանրաքվե: Ասենք թե պաշտոնանկվեցին ՍԴ անդամներն ու սերժառոբական համակարգին անվրույր ծառայած ամբողջ դատավորաբույլը մնաց իր տեղերում, պտի ասեք, թե արդարադատության համակարգում էլ եղավ հեղափոխությո՞ւն: Ու էդ դատավորները պտի որոշեն ապօրինի գույքի վերադարձի վեճե՞րը, քաղաքացիների ու մարդու իրավունքների դեմ տասնամյակներ տևած պետական հանցագործությունների ելքե՞րը, օյ, ինչ եք ասում...

Ապշելու բան է իշխանության բերած մուտացիան, որ անճանաչելիորեն է կերպարանափոխում իշխանավորին, նախկին հեղափոխականին կամ բողոքի ելած, բայց պաշտոնյա դառած քաղաքացուն: Ես, թվում է, վաղուց չպիտի զարմանայի նման մուտացիաներից, բայց արի տես, որ դեռ զարմանում եմ: Երևի նրանից է, որ ԱԺ-ում շատերին անձամբ գիտեմ:

Արդարադատության համակարգի մաքրագործման կամ արմատական բարեփոխման այս խորամանկ ու ծավալուն սաբոտաժը հենց այնպես չի պատահել: Սա կեղծավորի, հետադիմականի, հանցագործականի հետևողական, համառ, տքնաջան մաքառման արդյունքն է, իսկապես կարողացան ավելի ուժեղ լինել, քան այս ամենին շատ թեթև և էյֆորիկ նայող հեղափոխականների խումբը:

Սա, առնվազն այս հարմարվողականությունը, դավադիր կեղծավարությունը մեծ մարտահրավեր է մեզ բոլորիս, յուրաքանչյուր քաղաքացուն ու Հայաստանի բազմաչարչար հանրապետությանը, որպես քաղաքացու երջանկությունն ապահովելու կոչված մեխանիզմի: Սա ընկալող յուրաքանչյուրի պարտքն է կարեցածի չափով և նույնիսկ գերմարդկային ջանք դնել այդ սաբոտաժը հաղթահարելու և հեղափոխությունը շարունակելու համար, ինչպես վարվել ենք նախկինում: Էլի ստացվեց այնպես, որ նույնիսկ մարտավարական նահանջի տեղ չկա:

Եթե ինչ-որ մեկն ավելորդ դրամատիզմ կամ ողբերգություն է տեսնում այս դիրքորոշմանս մեջ, թող ես լինեմ սխալված. իմ սխալից դեռ ոչ մեկն ապօրինի չի դատապարտվել կամ հիվանդացել կամ մեռել կամ թալանվել: Ներող կլինեք»: