Խոշոր նավթարդյունահանողները համաձայնության են եկել 15%-ով կրճատման շուրջ

Երկու օր տևած բանակցություններից հետո, OPEC+ նավթարդյունահանողների դաշինքը և G20-ի անդամ երկրները պայմանավորվել են կայունացնել նավթի շուկան, որը հայտնվել էր փլուզման եզրին՝ կորոնավիրուսի համավարակի և նավթի պահանջարկի անկման պատճառով:

Մարտի վերջին նավթի գները հավասարվել էին նախորդ 20 տարիների ցուցանիշներին՝ Brent տեսակի նավթը 2002-ից ի վեր առաջին անգամ ցածր էր 22 դոլարից:

Այն երկրները, որոնք օրական 70 միլիոն բարել նավթ են արդյունահանում (կազմում է համաշխարհային արտադրության 70%-ը) համաձայնության են եկել արդյունահանումը կրճատել 15 միլիոն բարելով առաջիկա երկու ամիսների ընթացքում: Այս մասին հայտարարել է Ռուսաստանի էներգետիկայի նախարար Ալեքսանդր Նովակը՝ «Россия 24»-ին տված հարցազրույցում: OPEC+գործարքի մասնակիցները (կարտելի անդամները, Ռուսաստանը և մի քանի այլ նավթարդյունահանողներ), որոնք ընդհանուր առմամբ արտահանում են օրական 43,8 միլիոն բարել նավթ, կնվազեցնեն արտադրությունը 10 միլիոն բարելով, ԱՄՆ-ը, Կանադան, Նորվեգիան և այլ երկրներ կապահովեն մնացած ցուցանիշները (ևս 5 միլիոն բարել):

Ապրիլին կորոնավիրուսի համավարակի պատճառով նավթի պահանջարկը կընկնի օրական առնվազն 16,8 միլիոն բարելով, բայց անկումը կարող է լինել երկու անգամ ավելի շատ՝ 30-40 միլիոն բարել։ Այս մասին զգուշացնում է Bank of America-ի վերլուծաբան Կարեն Կոստանյանը:

OPEC+ նավթարդյունահանողների դաշինքը և G20-ի անդամ երկրները պարզապես շտկել են ստեղծված իրավիճակը։ Նույնիսկ առանց Ռուսաստանի ու Սաուդյան Արաբիայի համաձայնագրի արդեն ապրիլին երկրները կկրճատեին նավթարդյունահանումը․ ԱՄՆ-ն արդեն իսկ սկսել էր կրճատել սեփական արդյունահանումը։