Զարուհի Բաթոյանը՝ առցանց համակարգի հետ կապված խնդիրների մասին

Աշխատանքի և սոցիալական հարցերի նախարար Զարուհի Բաթոյանը «Ազատություն» ռ/կ-ի եթերում պատասխանել է քաղաքացիների հարցերին:

Օգտատերերից մեկի հարցին, թե դեկտեմբերից գիշերօթիկի աշխատակիցների մեծ մասը Բաթոյանի «թեթև ձեռքով գործազուրկ է դարձել, այս դժվարին օրերին ինչո՞ւ Բաթոյանը չի մտածում նաև նրանց մասին, որևէ կերպ կարո՞ղ են օգտվել կառավարության միջոցառումներից, թե՝ ոչ»:

Հարցին ի պատասխան Բաթոյանն ասել է. «Գիշերօթիկի աշխատակիցները նույն աշխատանքը չեն կատարում, որովհետև երեխաներին ընտանիք վերադարձնելու ծրագիրն ենք իրականացրել և երեխաները այսօր ապրում են ընտանիքում: Բոլոր աշխատակիցները կամ աշխատանքից ազատված մարդիկ, հղի կանայք, նրանց ընտանիքի անդամները, երեխաները, այսինքն՝ բոլոր այդ մարդիկ մեր ծրագրերի պոտենցիալ շահառուներն են, եթե համապատասխանում են ծրագրի չափանիշներին: Այսինքն՝ եթե այս քաղաքացիները, որոնց մասին նշվեց, ծրագրերից որևէ մեկի շահառու են, ապա կարող են օգտվել: Այս պահին միանշանակ կարող եմ ասել, որ առնվազն երկու ծրագրերով՝ կոմունալների փոխհատուցման ծրագրերով՝ 11-րդ և 12-րդ ծրագրով, վստահաբար կարող են լինել շահառու»:

Քաղաքացիները դժգոհում են, թե իրենց անունները չկան ծրագրերում: Այս առնչությամբ Բաթոյանն ասել է. «Այս պահին օնլայն համակարգի հետ կապված խնդիր չկա, երեք ծրագրերի դեպքում մարդիկ դիմում գրելու անհրաժեշտություն չունեն, խոսքը 4-րդ, 6-րդ և 7-րդ ծրագրերի մասին է: 4-րդ ծրագիրը, օրինակ, որը վերաբերում է մինչև 14 տարեկան երեխա ունեցող ընտանիքներին, որոնց անդամներն ազատվել են աշխատանքից, այս ծրագրի դեպքում շահառուների ցանկն ամբողջական չէ, ամբողջությամբ ՊԵԿ-ը դեռ մեզ չի տրամադրել: Սա գուցե կարող է լինել պատճառ, որ դեռևս լրացված չէ: Որոշակի օրեր անց, օրինակ, վաղը կամ մյուս օրը մարդիկ կարող են նորից փորձել»:

Մանրամասները՝ տեսանյութում: