Սպայական կազմի և նրանց ընտանիքի անդամների բուժսպասարկումը կդառնա ամբողջությամբ փոխհատուցվող

Կառավարությունըն ապրիլի 23-ի նիստում փոփոխություն կատարեց իր նախկինում ընդունած որոշումներից մեկում, որն առնչվում է զինծառայողներին:

Այսպես, ներկայումս «Զինծառայողներին, ինչպես նաև փրկարար ծառայողներին և նրանց ընտանիքի անդամներին բժշկական օգնության ծառայություններ» ծրագրի շրջանակներում զինծառայողների ընտանիքների անդամների համար նորագույն և թանկարժեք տեխնոլոգիաների կիրառմամբ մատուցվող որոշ ծառայություններ, այդ թվում սրտի վիրահատությունները, իրականացվում են արտոնյալ պայմաններով՝ համավճարային սկզբունքով՝ առողջապահության նախարարի հրամանով հաստատված գներով: Փոփոխությամբ ամրագրվում է՝ զինծառայողների ընտանիքների անդամներին նորագույն և թանկարժեք տեխնոլոգիաների կիրառմամբ մատուցվող ծառայություններն իրականացնել ամբողջությամբ պետության կողմից երաշխավորված անվճար պայմաններով:
Առողջապահության նախարար Արսեն Թորոսյանը պարզաբանեց. «Ստացվել էր այնպես, որ ժամկետային զինծառայողների ծնողներն իրենց բարդ և թանկարժեք վիրահատությունների համար ստանում էին պետությունից 100 տոկոս փոխհատուցում, իսկ պայմանագրային զինծառայողները և սպայական կազմն այդ նույն ծառայությունից օգտվում էր համավճարի սկզբունքով: Ստացվել էր մի անհավասար վիճակ, որը մենք փորձում ենք այս որոշումով ուղղել»։