ՀՀ արտգործ նախարարը՝ հայ-թուրքական հարաբերությունների մասին

«Ցեղասպանության կանխարգելումը չափազանց կարևոր ազգային և միջազգային օրակարգային հարց է: Մենք՝ որպես ցեղասպանություն վերապրած ժողովուրդ, ունենք պարտավորություն առաջ տանելու և մեր կողմից ներդրում ունենալու ցեղասպանության կանխարգելման օրակարգի մեջ»,- Հանրային հեռուստաընկերության եթերում ասել է ՀՀ արտաքին գործերի նախարար Զոհրաբ Մնացականյանը:

Նախարարը հայտնել է, որ Հայաստանը շարունակաբար աշխատում է միջազգային գործընկերների հետ. «Կանխարգելումն սկսվում է ազգային մակարդակից, բայց միջազգային համագործակցությունը չափազանց կարևոր է»,- նշել է նա:

Անդրադառնալով հայ-թուրքական հարաբերություններին՝ արտգործ նախարարն ասել է. «Յուրաքանչյուր քայլ քաղաքականության մեջ սառնասիրտ և հավասարակշռված հաշվարկի արդյունք պետք է լինի և այդ մոտեցումով էլ մենք մոտենալու ենք հայ-թուրքական հարաբերություններին: Բացի նրանից, որ մենք ապրում ենք ժխտված արդարության պայմաններում, դրան ավելանում են այլ տարբեր քայլեր Թուրքիայի կողմից, որոնք էլ ավելի են խորացնում խնդիրը: Այս բոլոր հանգամանքները միասին վերցրած հանդիսանում են մեզ համար սպառնալիք: Մենք այդ սպառնալիքին անդրադառնում ենք այնպես, ինչպես պետք է անդրադառնա պետությունը՝ սառնասիրտ, հավասարակշռված հաշվարկով, մենք ապահովում ենք մեր ազգային անվտանգությունը»:

Մանրամասները՝ տեսանյութում: