«Միջանցքներում ասում են՝ սա ո՞ւմ դեմ է ուղղված»․ Գ․ Պետրոսյանը՝ իր օրինագծի մասին

ԱԺ պետաիրավական հարցերի հանձնաժողովի ապրիլի 30-ի նիստում որոշեց քառօրյայի օրակարգ չընդգրկել ԲՀԿ-ական պատգամավոր Գևորգ Պետրոսյանի՝ «ՀՀ Քրեական օրենսգրքում» փոփոխություն կատարելու նախագիծը:
Նախագծով առաջարկվում էր Քրեական օրենսգրքով սահմանված վաղեմության ժամկետ չկիրառել սահմանադրական կարգի տապալման դեպքում: Առաջարկը վերաբերում էր վաղեմության ժամկետի հիմքով թե՛ քրեական պատասխանատվության ենթարկելուն, թե՛ պատժից ազատելուն:
«Սահմանադրական կարգի տապալումն այն հոդվածն է, որ դրա համար մեղավոր անձի համար օրենքը վաղեմություն չպիտի ճանաչի: Սահմանադրական կարգի տապալումը լրջորեն վնասում է երկրի սահմանադրական անվտանգությունը»,- ասաց օրինագծի հեղինակ Գ. Պետրոսյանը:
«Միջանցքներում ասում են՝ սա ո՞ւմ դեմ է ուղղված: Ես երբեք անձանց համար կամ դեմ օրինագծեր չեմ ներկայացնում: Նման խնդիր չկա»,- նշեց պատգամավորը:
Կառավարությունն առարկություն էր ներկայացրել: Ըստ գործադիրի՝ սահմանադրական կարգի տապալումը մարդկության, խաղաղության դեմ ուղղված հանցագործություն չէ և երկրորդ՝ տարիների ընթացքում քրեական գործի ապացույցները հնանում են, ապացուցման միջոցներն էլ դառնում ոչ պիտանի:
Նիստին արդարադատության փոխնախարար Սրբուհի Գալյանը հարցրեց, թե միջազգային փորձն ի՞նչ է ասում, այդ նորմը ո՞ր երկրներն են կիրառում: Գ. Պետրոսյանը նշեց.
«Մեր վարչապետը սիրում է ասել՝ խնդիրները մեր գլխում հաղթահարենք: Պարտադիր չէ տեսնենք, օրինակ, Մոզամբիկում կա նման բան, թե ոչ: Իմ ինչի՞ն է պետք հարավամերիկյան կամ եվրոպական երկրներում ի՞նչ կա», - նկատեց Պետրոսյանը։ Պատգամավորի համար քվեարկությամբ մերժումը սպասելի էր: