«Խոհանոցի թաքստոցից ինչ հայտարարություն ասես՝ կարող են անել». Հրաչյա Հակոբյան

ԱԺ «Իմ քայլը» խմբակցության պատգամավոր Հրաչյա Հակոբյանը, մեկնաբանելով ՀՀ 3-րդ նախագահ Սերժ Սարգսյանի փեսա Միքայել Մինասյանի ֆեյսբուքյան վերջին տեսաուղերձի ժամանակ հնչեցրած այն պնդումը, որ նրա հանդեպ իրականացվում է քաղաքական հետապնդում, նշել է. «Կա հետապնդում, կա շատ կոնկրետ քրեական գործ և էս ամեն ինչը, ինչ տեղի է ունենում՝ էս տեսուղերձները, էս ֆեյքային հարձակումները, էս լրատվամիջոցներով արվող տարբեր սուտ հայտարարությունները, խոսում են այն մասին, որ նրանք շատ լավ տեղյակ են այդ քրեական գործի նյութերին: Խոհանոցի թաքստոցից նրանք ինչ հայտարարություն ասես՝ կարող են անել...»:

Անդրադառնալով պատգամավոր Վահագն Հովակիմյանի այն պնդմանը, որ Միքայել Մինասյանը և Արթուր Վանեցյանը վաղեմի ընկերն են, Հակոբյանը նշեց. «Ես չեմ ունեցել էդպիսի տեղեկատվություն»:

Պատգամավորը նաև շեշտեց, որ այդ տեսաուղերձները ոչնչի մասին են և մեջբերեց փեսայի աներոջ խոսքը՝ ինչպես տատս էր ասել՝ դրա համա՞ր էինք հավաքվել: