«Քրեական որևէ գործ ուղղորդմամբ հարուցվել չի կարող». նախարարը՝ պատգամավորին

ԱԺ մայիսի 7-ի նիստում ԼՀԿ պատգամավոր Անի Սամսոնյանը բարձրացրեց համայնքների անկախության հարցը: Նա տարածքային կառավարման և ենթակառուցվածքների նախարար Սուրեն Պապիկյանին հարցրեց, թե ի՞նչ քայլեր են ձեռնարկվել, որպեսզի համայնքները դառնան անկախ, կարո՞ղ են վստահ ասել, որ որևէ ճնշում համայքների վրա չկա:
«Մենք մտավախություն ունենք, որ մարզպետների միջոցով համայնքների վրա ճնշումներ գործադրելու քաղաքականությունը շարունակվում է: Օրինակներ ունենք՝ Արարատի մարզի Նորաշեն համայնքը, Արմավիրում՝ Եղեգնուտը, Լոռու մարզում՝ Գյուլագարակը, նաև ունենք Կոտայքի մարզը, երբ քաղաքապետի դեմ քրգործեր են հարուցվում՝ այն դեպքում, երբ Երևանում այդ ապօրինություննները կարող են անտեսվել»,- նշեց պատգամավորը:
Նախարար Ս. Պապիկյանն ասաց. «Այդ քաղաքականությունը շարունակվել չի կարող, հատուկ քայլեր կատարել դրա համար պետք չեն: Հակառակը՝ պետք են քայլեր, եթե նման երևույթներ ի հայտ գան: Մնացածն ամրագրված է ՀՀ օրենքով, և իմ դերակատատարումը որպես տարածքային կառավարման և ենթակառուցվածքների նախարար, իմ ունեցած գործառույթների շրջանակներում դրան հետևելն է ու նաև օգնելը, որպեսզի ՀՀ բոլոր համայնքներում ամրագրվեն ժողովրդավարությունն ու օրենքի գերակայությունը»:
Ս. Պապիկյանը նշեց, որ այս հարցում խտրականություն լինել չի կարող, և եթե պատգամավորը սուբյեկտիվիզմի տարրեր նշմարում է, կարող են միմյանց հետո անհատապես զրուցել: Նա անհասկանալի համարեց, թե ինչու են իրնեց երբեմն ասում, թե ինչու չեն օգնում, որ այս կամ այն համայնքապետը չպաշտոնավարի: Իրենք ոչ մեկին այդ հարցում չեն օգնելու:
«Ինչ վերաբերում է նրան, թե ինչ-որ համայնքապետի նկատմամբ պատվերով քրեական գործեր են հարուցվում, ես խնդրում եմ ավելի հստակ պարզաբանում, որովհետև այն, ինչ Դուք նշում եք, դա անընդունելի է, նման բան լինել չի կարող: Քրեական որևէ գործ ուղղորդմամբ հարուցվել չի կարող»,- նշեց նախարարը: