«Շուտով Ստեփանակերտն է համավարակի էպիկենտրոնը դառնալու»․ Տիգրան Գրիգորյանի հորդորն ԱՀ ղեկավարությանը

Արցախի «Ազգային վերածնունդ» կուսակցության անդամ Տիգրան Գրիգորյանը ֆեյսբուքյան իր էջում գրել է. «Արցախի իշխանություններն էլ են համավարակի դեմ պայքարում հույսը դրել քաղաքացիների ինքնագիտակցության ու պատասխանատվության վրա: Կարծում եմ՝ Հայաստանի օրինակը ցույց պիտի տար, որ դա անհույս և անհեռատես քաղաքականություն է: Վրաստանի փորձն ավելի ուսուցանելի է: Քանի դեռ վարակվածների քանակն այդքան մեծ չէ և տարածումը դեռևս հնարավոր է վերահսկել, պետք է խիստ միջոցներ ձեռնարկել: Սահմանափակել քաղաքացիների ազատ տեղաշարժը Ստեփանակերտում և այլ խոշոր բնակավայրերում, փակել սրճարանները և ժամանցի այլ վայրերը: Սահմանված կանոնները խախտելու համար լուրջ տուգանքներ սահմանել և անխտիր բոլոր խախտողներին տուգանել: Վերածննդի հրապարակում երեկոյան ասեղ քցելու տեղ չի լինում: Եթե այս մինիմալ քայլերը չձեռնարկվեն, շուտով Ստեփանակերտն է համավարակի էպիկենտրոնը դառնալու: Գոնե այս հարցում պոպուլիզմը մի կողմ դրեք»: