Կիրակի, 05 հուլիսի, 2020 թ.
|
Ստեփանակերտում`   +24 °C

«Աղետի դեպքում որոշումն անիմաստ է, եթե դրա կատարումը չի վերահսկվում». Հրանուշ Խառատյան

«Աղետի դեպքում որոշումն անիմաստ է, եթե դրա կատարումը չի վերահսկվում». Հրանուշ Խառատյան
65
Հինգշաբթի, 04 հունիսի, 2020 թ., 17:40

Ազգագրագետ Հրանուշ Խառատյանը ֆեյսբուքյան իր էջում գրել է. «Կորոնավիրուսը հաստատ չի տարբերակում՝ մենք Իմքայլական ենք, ՀՀԿ, ՀՅԴ, ՀՀՇ, ԲՀԿ, Լուսավոր թե լուսեղեն, վարչապետ, դատավոր, գործազուրկ, հանցագործ, բարոյական, անբարոյական, ազնիվ, անազնիվ, հավատացյալ, անհավատ, կին, տղամարդ, հայ, ռուս, եզդի, ակտիվ, պասիվ, քաղաքացի, գյուղացի... Հավատում ենք կորոնավիրուսի փաստին, թե ոչ, կորոնավիրուսը վարակելիս չի հարցնում հավատի մասին: Կորոնավիրուսը մեզ բոլորիս է սպառնում: Հայաստանում՝ ՀՀ-ում գտնվող բոլոր մարդկանց՝ ՀՀ քաղաքացիներին և հյուրերին: Գոնե այսքանով կորոնավիրուսը մեզ միավորում է մեկ ընդհանուր «մենք»-ի մեջ:
Կորոնավիրուսի դեմ պայքարի գործողություններում նույնպես խմբերի և համոզմունքներ կրողների բաժանում չկա: Հավատում են մարդիկ, թե ոչ կորոնավիրուսի փաստին, բոլորը, բոլորը պարտավոր են ենթարկվել կորոնավիրուսից պաշտպանվելու կառավարության կողմից ստեղծված պաշտոնական մարմնի որոշումներին: Մենք/մարդիկ կարող ենք պաշտպանվելու ավելի ռացիոնալ, ավելի արդյունավետ առաջարկներ անել, հիմնավորել այդ առաջարկները, հանրայնացնել դրանք, բայց այդ բոլորը՝ բացառապես եղած որոշումներին աներկբա ենթարկվելու պայմաններում: Եթե նույնիսկ կասկածում ենք այդ որոշումների արդյունավետությանը: Դրանց արդյունավետությունը կարող է նվազ լինել, բայց հաստատ վնասակար չեն:

Բայց... անկախ կորոնավիրուսի նկատմամբ հասարակության տարբեր շերտերի և անհատների վերաբերմունքից, կառավարությունը
ա/ պարտավոր է որոնել և գտնել կորոնավիրուսի տարածումը կանխելու ավելի արդյունավետ միջոցներ, փաստարկել դրանք և որոշումներ կայացնել այդ ուղղությամբ,
բ/ պարտավոր է գտնել իր որոշումների կատարումը վերահսկելու ավելի արդյունավետ միջոցներ: Եթե դրանք նույնիսկ խախտողների նկատմամբ պատժամիջոցներ են: Եթե նույնիսկ դրանք «բերման ենթարկումներ են»: Եվ անընդհատ ստուգել վերհսկողության արդյունքները: Ոչ թե՝ քանի մարդ է տուգանվել, այլ որքան է նվազել տարածումը:
Չկա մի երկիր, որտեղ մարդիկ չեն շրջանցում կառավարությունների որոշումները: Կան բազմաթիվ երկրներ, որտեղ չեն կարողանում վերահսկել որոշումների կատարումը: Աղետի դեպքում որոշումն անիմաստ է, եթե դրա կատարումը չի վերահսկվում»: