«Թե ինչ նպատակի էր այդ ամենը ծառայելու, ավելի պարզ է դառնում». Գևորգ Գալստյան

Քաղաքագետ, «Ազգային-Ժողովրդավարական Բևեռ»-ի մասնակից Գևորգ Գալստյանը ֆեյսբուքյան իր էջում գրել է. «Ժողովուրդը ներկայիս իշխանությանն է «պարտական» մերժված ռեժիմի իշխող ուժերի, դրանց սպասարկող պիգմեյ կուսակցությունների և լակեյների՝ քաղաքական ընդդիմության կերպարանքով հանդես գալու հանդգնության համար: Ներկայիս իշխանությունների՝ ի դեմս Ն. Փաշինյանի, անզորության կամ թողտվության արդյունքում մերժվածները հնարավորություն ստացան մասնակցելու հեղափոխական շարժման պարտադրած արտահերթ ընտրություններին: Ստացան քաղաքական վերածնման հնարավորություն՝ պետությունը կախյալության, կեղծիքի և բռնության մեջ խեղդելու համար արդարադատության ենթարկվելու փոխարեն:
Իսկ թե ինչ նպատակի էր այդ ամենը ծառայելու, հետզհետե ավելի պարզ է դառնում: Ժողովուրդը պետք է այսօր իր պայքարի պտուղները վայելեր, այլ ոչ թե սթրեսային և անորոշ վիճակում պայքարեր անցյալի ուրվականների դեմ: Ժողովրդին ծեծող ու նրա բողոքը վիժեցնող ոստիկանի համազգեստով ենիչերը պետք է պատասխանատվության ենթարկված լիներ, այլ ոչ թե նոր ոճրագործություն իրականացնելու «կանաչ լույս» ստանար: Այս ցանկը երկար կարելի է շարունակել:
Բայց մեր Պետության լավագույն օրերը դեռ առջևում են: Հայ Ազգը ունեցել է և հիմա էլ ունի ազնիվ զավակներ, ովքեր ջախջախելու են Պետության և Ժողովրդի դեմ նյութվող դավերը»: