«Հայաստանում ՍԴ-ն արդարադատության հետ ընդհանրապես կապ չունի». Հայկ Մարտիրոսյան

Քաղաքագետ Հայկ Մարտիրոսյանը ֆեյսբուքյան իր էջում գրել է. «Ի դեպ, տերմինաբանությունից և իրավաբանական տառակերությունից դուրս՝ իրական հարթությունում Սահմանադրական դատարանն ամենևին դատարան չէ:

Հայաստանում այն զուտ քաղաքական մարմին է: Այն գրեթե զուտ քաղաքական մարմին է անգամ ԱՄՆ-ում, որտեղ Գերագույն դատարանն իրոք մաս է կազմում դատական համակարգին և ունի թե՛ քրեա-քաղաքացիական և թե՛ սահմանադրական ազդեցություն: ԱՄՆ-ում այդ գերագույն մարմնի քաղաքական բնույթն առավել ազնվորեն և բաց է արտահայտված, որտեղ գերագույն դատավորները նշանակվում և պաշտոնավարում են փաստացիորեն քաղաքական և հատկապես կուսակցական սկզբունքով միայն:

Հայաստանում ՍԴ-ն արդարադատության հետ ընդհանրապես կապ չունի:

Սահմանադրական դատարանն իրականում քաղաքական մարմին է՝ զուտ և քաղաքական գործառույթով, որը կարող է ունենալ որոշակի ազդեցություն իրավական դաշտի վրա, բայց որին իրականում իրավաբանական սքեմ են հագցրել:

ՍԴ-ն դատական համակարգն աղտոտող մարմին ներկայացնողները մանիպուլյատիվ սուտ են ամրագրում զանգվածների գիտակցությունում՝ ստեղծելով տպավորություն, թե անցել են դատական համակարգը մաքրելուն և մաքուր արդարադատություն հաստատելուն՝ մինչդեռ ՍԴ հետ ընթացող քաղաքական գործընթացներով միայն քաղաքական խնդիր են լուծում, իսկ դատական համակարգում շարունակում բացարձակ անգործությունը:

Եվ վերջում. Թովմասյանը պետք է վաղուց հեռանար: Բայց ովքե՞ր են գալու զբաղեցնելու նոր թափուր տեղերը:

Սա է ամենակարևոր հարցն այսօր և սա է, որ պետք է մտահոգի մեզ»: