«Պետբյուջեն լցնելու տարբերակը նոր չէ` «կթել» Երևանին». Հայկ Խանումյան

Արցախի «Ազգային վերածնունդ» կուսակցության նախագահ Հայկ Խանումյանը ֆեյսբուքյան իր էջում գրել է. «Արդեն գրել էի պետական բյուրոկրատիայի ուռճացման մարտահրավերի մասին: Այս տարի, երբ սեփական եկամուտների անկման ռիսկ կա, Արցախում ամեն գնով պետք է խուսափեին պոպուլիստական ծրագրերից և պետական համակարգը մեծացնելուց: Բայց պարզվում է՝ իշխանության եկած պոպուլիստներն ու նրանց հուշագրային գործընկերը թքած ունեն տնտեսության զարգացման վրա: Գլխավոր նպատակ է դառնում Արայիկ Հարությունյանի և Սամվել Բաբայանի համակիրների համար պետական նոր հաստիքների ստեղծումը: Փաստացի սրանք «Ազատ հայրենիք» և «Միասնական հայրենիք» կուսակցությունների գրասենյակներ են, որոնց աշխատակիցներին վճարում են պետական բյուջեից: Իսկ պետական բյուջեն լցնելու տարբերակը նոր չէ՝ «կթել» Երևանին: Պարզ է դարձել, որ ՀՀ պետական բյուջեից Արցախին լրացուցիչ 12,6 մլրդ դրամ բյուջետային վարկ է տրամադրվելու»: