«Ի՞նչն է խանգարում՝ մի 3 ժամանոց արտահերթի ընթացքում էլ բարձրացնել թոշակ, նպաստ, աշխատավարձ». Լիլիթ Գալստյան

ՀՅԴ Հայաստանի Գերագույն մարմնի անդամ, ԱԺ նախկին պատգամավոր Լիլիթ Գալստյանը ֆեյսբուքյան իր էջում գրել է. «Կամք ի ձեռս անօրինի

ԱԺ մեծամասնության խորհրդարանական շքերթը մտքումս Ֆրիկի «Գանգատ»-ից հայտնի ՝ «կամք ի ձեռս անօրինի» տողերն էր արթնացնում…

Փաստորեն, երեք ժամում մեկ կուսակցության կամոք հնարավոր է Սահմանադրություն փոխել, և ամենակարևորը՝ հիմնավորել, որ կատարվում է հանուն ժողովրդի երջանկության: Քաղաքական համատեքստում երջանկություն բառն այնքան էլ զարմանալի չէր: Արդեն կառավարության ծրագրում՝ իբրև նպատակադրում, ամրագրվել էր երջանկություն բառը:

Երեկ կայծակնային՝ երեք ժամում ԱԺ-ն հասցրեց երջանկացնել նաև ՀՀ նախագահին, որն իր իսկ լուռ համաձայնությամբ կեսգիշերին սեփական ստորագրությամբ նվաճեց սեփական երջանկությունը՝ զրկելով ինքն իրեն այսուհետ սահմանադրական փոփոխության տակ ստորագրելու իրավունքից: Իսկ թե որքան էր ՀՀ նախագահը սրտնեղում սահմանափակ լիազորություններից, դա արդեն բոլորովին կարևոր չէ. կարևորը ժողովուրդը երջանիկ լինի:

Դարձյալ Ֆրիկի «Գանգատ»-ի հանգույն, համաձայնենք, որ «արդ այս բանս է հիանալի» և կարելի է երեք ժամում երջանկացնել «ժող. ջանին», այդ դեպքում ի՞նչն է խանգարում, հանուն ՀՀ հպարտ քաղաքացիների, մի երեք ժամանոց արտահերթի ընթացքում էլ բարձրացնել թոշակ, նպաստ, աշխատավարձ…: Պատկերացնո՞ւմ եք, թե ինչ համատարած երջանկություն կպարգևեք:

Մանավանդ որ հստակ է՝ համավարակի դեմ ձեռնարկած միջոցառումներն էական ազդեցություն չեն ունեցել և միլիարդավոր դրամներ են, փաստորեն, փոշիացվել:
Մանավանդ, որ ԿԱՄՔ Ի ՁԵՌՍ ԱՆՕՐԻՆԻ…»: