«Ի՞նչն է նպաստում կորոնավիրուսի «հաղթարշավին»». Սուրեն Սուրենյանց

Քաղաքագետ Սուրեն Սուրենյանցը ֆեյսբուքյան իր էջում գրել է. «Ի՞նչն է նպաստում կորոնավիրուսի «հաղթարշավին»

Հայաստանում հունիսի 25-ին հաստատվել է կորոնավիրուսով վարակվելու ռեկորդային՝ 771, մահվան՝ 12 նոր դեպք. վարակվածների ընդհանուր թիվը 22488 է, մահվան դեպքերինը՝ 528 (397+131):

Վիճակն, անշուշտ, մտահոգիչ է, չարախնդալու փոխարեն պետք է արվեն հետևություններ։

Ամենևին այնպես չէ, որ Հայաստանը կարող էր շրջանցել կորոնան, սակայն միանշանակ է նաև, որ կարող էինք չունենալ այսօրվա ողբերգական ցուցանիշները։

Դեմոկրատական երկրներում, որտեղ իշխանություններն ունեն լեգիտիմություն և վստահություն հասարակության կողմից, կորոնավիրուսը «հաղթարշավ» ապրեց մարտ-ապրիլ ամիսներին՝ ԱՀԿ-ի կողմից պանդեմիա հայտարարելու շրջանում։ Եվրոպական երկրների մեծ մասը, մեր հարևան Վրաստանը, վաղուց հաղթահարել են համավարակի կամ առնվազն դրա առաջին փուլի ճգնաժամային շրջանն ու հիմա զբաղված են համավարակի հարուցած տնտեսական, սոցիալական հետևանքների վերացմամբ։ Կրկնում եմ՝ այստեղ շատ կարևոր է երկրների դեմոկրատական բնույթը։ Պանդեմիայի առաջին փուլում իշխանությունների գերակշիռ մասը սահմանափակ պատկերացում ուներ վիրուսի մասին, սակայն ժամանակի ընթացքում արդյունավետ կառավարումն իրենն արեց ու ֆորս-մաժորային իրավիճակը հաղթահարվեց։
Հայաստանում «կայունացել» է ճգնաժամը, ինչի տեսանելի պատճառներից մեկն այն է, որ հասարակությունը չի կատարում կառավարության ցուցումները, այլ խոսքով՝ հեղափոխության թիմի ու հեղափոխություն արած ժողովրդի միջև որոշակի ջրբաժան է առաջացել, ու Նիկոլ Փաշինյանի թիմն առնվազն պետք է վերանայեր իր բարիկադային քաղաքականությունը՝ հասարակության ներսում նոր խրամատներ փորելու փոխարեն։ Այս հետևությունն ակնհայտորեն չի արվել, ինչի ցայտուն դրսևորումն էր նաև վարչապետի այսօրվա ելույթը։

Լեգիտիմությունն ինքնին չի երաշխավորում արդյունավետ կառավարում, սակայն ապիկար կառավարումը կարող է փոշիացնել լեգիտիմությունը։ Հիմա Հայաստանում գործում է հենց երկրորդ բանաձևը։ Ցավոք։

Կառավարությունը չունի ռացիոնալ մոտեցումներ, առաջին հերթին՝ քաղաքական, ծրագրային հարթության վրա։ Դրա համար էլ մենք համավարակի հարցում «առաջատար» ենք ու ընդամենը պետք է սեփական ձախողումներն ընդունել ու արմատապես քաղաքականություն վերանայել՝ ընդդիմությանն ու ԶԼՄ-ներին թիրախավորելու փոխարեն»։