«Որոշեցինք, որ ադրբեջանցիների ակցիան պիտի տապալենք». Ստրասբուրգում հայ համայնքը միասնության ակցիա է իրականացրել

Ֆրանսիայի Ստրասբուրգ քաղաքի հայ համայնքն այսօր միասնության ցույց է իրականացրել՝ ի պաշտպանություն հայ-ադրբեջանական սահմանին կռվող հայ զինվորի: MAMUL.am-ին հաջողվել է կապ հաստատել ակցիայի կազմակերպիչների հետ. «Մենք նախապես մտադրություն չունեինք Ադրբեջանի հյուպատոսության շենքի դիմաց ցույց անելու, քանի որ մենք հաղթողի դերում ենք։

Բայց ուրբաթ օրը հավաստի աղբյուրներից տեղեկություն ստացանք, որ իրենք են ԵԽԽՎ-ում հայկական պատվիրակության շենքի դիմաց որոշել բողոքի ցույց կազմակերպել: Այդպես որոշեցինք, որ պետք է անպայման իրենց ցույցը տապալենք»,- պատմում է Ստրասբուրգի «Հայորդի երիտասարդաց» միության անդամ Համլետ Հովսեփյանը՝ նշելով, որ երկուստեք ակցիային հայերի թիվը շուրջ 300 էր, ադրբեջանցիներինը՝ 50:

Ըստ նրա, ադրբեջանցիները նախապես մոտ 20 հոգով են եղել, հետո, երբ իմացել են, որ հայերն իրենց սպասում են, զանգահարել են և մյուս ադրբեջանցիներից օգնություն խնդրել: Վերջապես, մի քանի ժամ ուշացումից հետո նրանք սկսել են իրենց ակցիան, սակայն չեն կարողացել հասնել քաղաքապետարանի հատկացրած վայր՝ Հայաստանի ներկայացուցչության դիմացի փողոց:

«Մերոնք վազեցին դեպի ադրբեջանցիները և նրանք մնացին իրենց տեղում մեխված՝ չկարողանալով մոտենալ մեր ներկայացուցչության շենքին, սա մեծ բան էր»,- պատմեց մեր զուցակիցը:

Ստրասբուրգի գլխավոր փողոցներից մեկը մի քանի ժամ փակ է մնացել: Շուրջ 2 ժամ հայկական կողմը երգել է, պարել, կոչեր հնչեցրել, մինչև որ ադրբեջանցիները հոգնել են ու հեռացել՝ չհասնելով իրենց նպատակին:

«Մեր ներկայացուցչության շենքի մոտից մինչև ադրբեջանցիները մոտ 300 մետր բաժանում էր, ու թեև հակացույց անելու թույլտվություն չունեինք և ոստիկանությունը շատ հանգիստ կարող էր մեզ ցրել, բայց նման քայլի չգնաց: Հենց դա էր մեր հաղթանակի էությունը՝ չունենալով ցույցի թույլտվություն՝ չեզոքացնել ադրբեջանցիների ցույցը: Ստրասբուրգի հայ համայնքի և ոստիկանության մեջ մեծ հարգանք կա, իրենք մեզ ընդառաջեցին: Նաև շատ ֆրանսիացիներ մոտենում էին մեզ ու իրենց զորակցությունը հայտնում: Անգամ ավտոբուսների վարորդներն իրենց աջակցությունն էին հայտնում երկար ազդանշանով, ինչը Ֆրանսիայում արգելված է»,- պատմում է մեր զրուցակիցը՝ շեշտելով, որ ամեն ինչ նորմալ է անցել, ոչ մի կողմից պրովոկացիաներ չեն եղել:

Մեր զրուցակիցը նաև նկատեց, որ նախկինում ադրբեջանական բոլոր ակցիաներում շատ են եղել թուրքական դրոշները, անինչ այսօրվա նրանց ցույցին կար միայն մեկ թուրքական դրոշ, մինչդեռ Ստրասբուրգի թուրք համայնքը շատ ազդեցիկ է:

Ստրասբուրգի հայ համայնքն այսքանով չի բավարարվել. «Ստրասբուրգում հայերը շատ համախմբված են ու վստահ եմ՝ նաև այլ համայնքների համար լավ օրինակ են ծառայում:
«Հայորդի երիտասարդաց» միության անդամներով որոշում կայացրեցինք նաև դրամահավաք կազմակերպել՝ ՀՀ զինված ուժերին փոքրիկ աջակցություն ցուցաբերելու համար։ Դրամահավաքի սկզբից ընդամենը 5 օր է անցել
և արդեն ունենք ավելի քան 6000€ նվիրատվություն:
Մինչ օրս դրամահավաքին մասնակցել է 100-ից ավելի մարդ՝ աշխարհի տարբեր ծայրերից, անգամ՝ Հայաստանից: Այն կավարտենք հուլիսի վերջին»,- ներկայացրեց Համլետ Հովսեփյանը:

Հարցին՝ ինչ նպատակով է գումարը ծախսվելու, նա պատասխանեց. «Ի սկզբանե դրամահավաքի գլխավոր նպատակը եղել է գիշերային տեսանելիության սարքավորումներ գնելը, բայց ՀՀ վարչապետի վերջին հորդորից հետո ՀՀ պաշտպանության նախարարության հետ կապ կհաստատենք և վերջնականապես կորոշենք, թե ինչ նպատակով կծախսենք»: