«Ի՞նչն է խանգարում ունենալ SU-57 կամ F-35 կործանիչներից, որոնցից նույնիսկ Թուրքիան չունի». Հայկ Գրիգորյան

«Ազգային առաջընթաց» կուսակցության լրատվության ղեկավար Հայկ Գրիգորյանը ֆեյսբուքյան իր էջում գրել է. «Ներկայումս աշխարհում ամենատարածված 5֊րդ սերնդի կործանիչներից են ամերիկյան F-35 և ռուսական SU-57։

Առաջինի գինը մոտ 100 մլն դոլար է, ռուսականը՝ 42 մլն դոլար։

Հայաստանը սրանցից չունի։ Հայաստանը ունի SU-25, ըստ որոշ տվյալների՝ 10 հատ։

Ի՞նչն է խանգարում ունենալ SU-57 կամ F-35 , որոնցից նույնիսկ Թուրքիան չունի։ ԱՄՆ պետք է վաճառեր Թուրքիային F-35, բայց Թուրքիայի կողմից ռուսական հակահրթիռային համակարգ գնելու պատճառով այդ գործարքը չեղարկվեց։

Թուրքիան ունի մոտ երկու հարյուր հատ F-15, որը համարժեք է ռուսական SU-35-ին։ Այսինքն՝ մեր մոտ առկա ինքնաթիռների գրեթե համարժեք դասի, բայց քանակով մոտ քսան երեսուն անգամ թվով շատ։

F-15 գինը մոտ երեսուն մլն դոլար է։ Ի՞նչն է խանգարում մի տասը հատ գնել սրանցից։

F-35 ունեն ԱՄՆ, Անգլիան, Ավստրիալիան ու մի քանի այլ երկիր։

Ինչո՞ւ չկազմակերպել համահայկական դրամահավաք ու նպատակ դնել մի քանի տարվա մեջ գնել երեք-չորս հատ F-35 ու մի տասը, քսան հատ F-15 կամ դրանց ռուսական համարժեքները։ Չասեք գումար չկա։ Գումար կա թե՛ Հայաստանի ներսում, թե՛ Արցախում, թե՛ Սփյուռքում, պետք է դնել նպատակ և կազմակերպել։

Պարգևատրում անելու, նոր ոստիկանություն ստեղծելու, ուռճացված պետական ապարատ պահելու և այլ անիմաստ հարցերի վրա ծախսվում են տասնյակ միլիոնավոր ԴՈԼԱՐ, ոչ թե՝ դրամ։

Ու չմոռանանք՝ թալանածի հետ վերադարձ ու այդ գումարներով նոր կործանիչների գնում։

Կրկնվեմ՝ F-35 գինը հարյուր միլիոն դոլար է, F-15 գինը՝ երեսուն մլն, ռուսական համարժեքները՝ դրա կես գինը։

Կարծում եմ, մի քանի ամսում սփյուռքը կարող է հավաքել մի քանի հարյուր միլիոն դոլար, եթե լինի վարչապետի կոչը, ուղիղ եթերով ուղերձը և բացատրությունը, թե դրա անհրաժեշտությունը որքան օրհասական է և հավաքված գումարների ծախսման հստակ մեխանիզմ նշվի, օրինակ՝ հատուկ հաշիվ, որը արդեն պայմանագիր կնքված պատրաստ է փոխանցման։ Այսինքն՝ կա երաշխիք, որ գումարը հավաքվելու դեպքում գնելու ենք այդ կործանիչները։

Անձամբ պատրաստ են իմ ներդրումը ունենալ այս գործում գումարային տեսքով»: