«Այն, որ այս ողբերգության վրա որոշ քաղաքական ուժեր իրենց ոչ մաքուր ձեռքերն են տաքացնում, նողկալի է». Կ. Հարությունյան

Լրագրող Կարինե Հարությունյանը ֆեյսբուքյան իր էջում գրել է. «Այն, որ ընտանիքում երեխաներ են պարբերաբար ծեծվել մի ողջ գյուղի աչքի առաջ եւ դրա հետեւանքով մեկը մահացել է, սահմռկեցնող է, բայց որ այս ողբերգության վրա որոշ քաղաքական ուժեր իրենց ոչ մաքուր ձեռքերն են տաքացնում, առնվազն նողկալի է: Այդ ինչո՞ւ հանկարծ նման ուժերը կամ որոշ գործիչներ դարձան երեխաների իրավունքների պաշտպան, մի՞թե իրենց հովանավոր ստնտուները չեն, որ տարիներ շարունակ իրենց քաղաքական եւ տնտեսական գործունեությամբ երկրում բազմաթիվ երեխաների բերանից հաց են կտրել, մի քանի հազարով նվաստացրել են նրանց մեծերին, եւ անգամ նրանցից «մի կիլո մսի» դիմաց շնորհակալություն են կորզել տեսախցիկի առաջ:
Ինչ վերաբերում է ընտանիքներում բռնության ենթարկվող երեխաներին, ավելի լավ է նման երեխաները մանկատանը մեծանան, քան ամեն օր կամ հաճախակի ապրել-չապրելու սահմանագծին լինեն: Եթե հասարակությունը չի կարողանում, ծուլանում է, կամ կուլ է գնում ծանոթ-բարեկամական հարաբերություններին՝ չմիջամտելով նման բռնություններին, ուրեմն պետությունն առնվազն կարող է նրանց համար սոցիալական ու կրթական հնարավորություններ ապահովել: Իսկ հարազատի ջերմություն, այդ երեխաները, այսպես թե այնպես չեն ստանում»: