«Շատ ուժեղ էր, բոմբը քցեիր՝ տենց ձեն չէր հանի». բնակիչներ

«Տեսել եմ տարհանման պրոցեսը, Փառք Աստծո, բնակիչներից որևէ մեկը վնասվածք չուներ, հոգեբանական շատ վատ վիճակում էին: 4 հարկ է փլուզվել, այսինքն՝ շենքը մասնակի: Մեր շենքը 25-30 մետր հեռավորության վրա է գտնվում»,- ասաց հարակից շենքի բնակչուհիներից Էմմա Ասլանյանը: «Լսել եմ, որ գտել են ևս մեկ քաղաքացու անձնագիր ու հիմա նրան են փնտրում, ենթադրվում է, որ փլատակների տակ է: Հուսանք՝ ամեն բան հարեհաջող կլինի»:

Հարակից շենքի բնակիչներից Վլադիմիր Մխիթարյանն էլ հավելեց, որ երբ պայթյունի ձայն են լսել, մտածել են՝ երկրաշարժ է. «Նստած հաց էի ուտում, մեկ էլ նենց ուժեղ վզռիվ եղավ, պատուհանից նայեցի՝ ծուխ, մուխ, հետո մարդիկ հավաքվեցին: Շատ ուժեղ էր, բոմբը քցեիր՝ տենց ձեն չէր հանի»:

Հիշեցնենք՝ այսօր ժամը 07:18-ին Ճգնաժամային կառավարման ազգային կենտրոն ահազանգ է ստացվել, որ Երևանի Ռայնիսի փողոցի թիվ 3 հասցեում գազի արտահոսքից տեղի է ունեցել պայթյուն, շենքը մասնակի փլուզվել է։ 2 տուժած հոսպիտալացվել է, 19-ը՝ տարհանվել, 1 քաղաքացի փլատակների տակ է: