«Ո՞վ է իջնում, լսում մարդուն. ես չեմ ասում՝ թող վարչապետն իջնի». Գ. Ծառուկյան

«Բարգավաճ Հայաստան» կուսակցության տարածքային կառույցների ներկայացուցիչների հետ հանդիպումները շարունակվում են: Գագիկ Ծառուկյանն այս անգամ Գեղարքունիքի մարզում էր: «Ցանկացած ոլորտ պրոբլեմի առաջ ա... մարդը չգիտի՝ բանկի տոկոս փակի, երեխուն կերակրի, թե ծնողին բուժի: Մարդիկ ծայրահեղ անդունդի մեջ են: Ցանկացած պաշտոնյա պարտավոր է իր ժողովրդով հետաքրքրվի, շրջի, լսի, լուծում առաջարկի պրոբլեմին»,- ասաց նա: Ծառուկյանն անդրադարձավ նաև արտակարգ դրության ամիսներին տարբեր ոլորտների ներկայացուցիչների բողոքի ակցիաներին. «Դիմում են, ասում՝ մեր վիճակը սա ա, հարգելի՛ իշխանություն, մի քայլ կատարե՛ք, հնարավորություն տվե՛ք... ո՞վ ա իջնում, լսում, ես չեմ ասում՝ թող վարչապետն իջնի, տվյալ ոլորտի մարդը թող իջնի, որ քաղաքացին զգա՝ իրա մասին մտածող կա»:

ԲՀԿ ղեկավարն անպտուղ ու անարդյունավետ որակեց կորոնավիրուսի դեմ պայքարը. «Մեկուսացող մարդուն դեղորայք, բժիշկ չեն տալիս, բոլորս էլ գիտենք՝ բուժելու համար 250-300 հազար դրամ է պետք, բայց մարդը եթե 5 ամիս չի աշխատում, ու մեր հարգելի, ասենք թե, իշխանությունն էլ 68 հազար է տվել: Հինգ ամիս ո՞նց պահի իրա գոյատևությունը»: