«Քոչարյան-Ծառուկյան «ընկերության» վերականգնման ականատեսն ենք լինում». Ալեն Սիմոնյան

«Երկրորդ և երրորդ նախագահների ակտիվացումը կապ ունի իրենց դեմ հարուցված քրեական գործերի հետ և ոչ մի այլ բանի հետ կապ չունի»,- այս մասին «Առաջին լրատվական»-ի եթերում ասել է ԱԺ փոխխոսնակ Ալեն Սիմոնյանը:

Հարցին, թե ԱԺ փոխխոսնակը, ինչպես շատերը, նույնպե՞ս այն կարծիքին է, որ ԲՀԿ-ն պատկանում է Ռոբերտ Քոչարյանին, Ալեն Սիմոնյանը պատասխանել է. «Ես չեմ բացառում որևիցե բան, որովհետև գիտեմ, որ երկուստեք ամեն ինչի պատրաստ են: Չեմ բացառում, որ ինչ-որ փուլում նրանք առանձին են գործել, բայց իմ փորձառությունը հուշում է, որ մենք ականատես ենք լինում Քոչարյան և Ծառուկյանի «ընկերության» վերականգնմանը և կոորդինատների առումով նույնականացմանը:

Հարցին, թե ի՞նչ բացատրություն կարող է տալ նրան, որ Մարտի 1-ի գործով բուն դատավարությունը չի ընթանում, ԱԺ փոխխոսնակը պատասխանել է. «Ամեն ինչ արվում է, որ ժամանակ շահվի և այդ ժամանակահատվածում հնարավոր լինի դրսից տղա բերել, իշխանության վարկանիշը փորձել իջեցնել, որ իշխանությունը թույլ լինի և իրենք կարողանան ինչ-որ սակարկությունների գնալ: Ինչ-որ մարտավարություն է, ըստ իս, ընտրված, որ հաջողությամբ չի ավարտվելու, որովհետև վարկանիշի հետ կապված իրենք, իրոք, խնդիր ունեն, որովհետև այն մարտավարությունը, որ իրենք որդեգրել են, չի աշխատում»: