«ՀՀ քաղաքացիների՝ ՌԴ մուտքի արգելքի վերաբերյալ հստակ ժամկետներ չկան». Աննա Նաղդալյան

ՀՀ ԱԳՆ խոսնակը, անդրադառնալով ՌԴ մեկնել ցանկացող ՀՀ քաղաքացիների խնդրին, հղում կատարեց Ռուսաստանի կառավարության մարտի 16-ի կարգադրությանը, որով սահմանվում են օտարերկրյա քաղաքացիների այն կատեգորիաները, որոնք կորոնավիրուսի դեմ պայքարի սահմանափակումների շրջանակում կարող են այցելել ՌԴ: Նրանք են, ի թիվս ՌԴ քաղաքացիների, ՌԴ քաղաքացիների ընտանիքի անդամները, խնամակալները և հոգաբարձուները՝ վավեր անձը հաստատող փաստաթղթերի և հարազատության աստիճանը վկայող փաստաթղթի ներկայացման դեպքում, բուժման նպատակով ՌԴ մեկնող ՀՀ քաղաքացիները՝ կրկին անձը հաստատող փաստաթղթի և Ռուսաստանի բուժհիմնարկի կողմից համապատասխան հրավերի առկայության դեպքում, ինչպես նաև Ռուսաստանում մշտական կացության կարգավիճակ ունեցող օտարերկրյա քաղաքացիները:

Աննա Նաղդալյանը շեշտեց, որ ՀՀ կառավարությունը շարունակում է աշխատանքեր տանել ռուսաստանյան կողմի հետ՝ Հայաստանի և Ռուսաստանի միջև կանոնավոր ավիափոխադրումները վերականգնելու շուրջ, ցավոք, ՀՀ քաղաքացիների ՌԴ մուտքի արգելքի վերաբերյալ հստակ ժամկետներ չկան: