«Ադրբեջանը փորձում է ետ վերցնել իր երկու մարդասպաններին, ովքեր պատիժը կրում են Արցախում». Ա. Նաղդալյան

ԱԳՆ խոսնակ Աննա Նաղդալյանը, ի պատասխան Գուրգեն Ալավերդյանի վերաբերյալ հարցին, թե արդյոք դիտարկվո՞ւմ է ռազմագերիների՝ «բոլորը բոլորի դիմաց» փոխանակելու հնարավորությունը, ասաց. «Հայաստանում ռազմագերիներ չկան: Ադրբեջանում մտացածին մեղադրանքներ են առաջադրվում Ադրբեջանի տարածքում հայտնված ՀՀ քաղաքացիների նկատմամբ, որոնք դեռևս չպարզված հանգամանքերում հայտնվել են Ադրբեջանի իրավասության ներքո: Հայաստանի քաղաքացիներն Ադրբեջանում որևէ հանցագործություն չեն իրականացրել և նրանց նկատմամբ շինծու գործերի հարուցումը միջազգային իրավունքի կոպիտ խախտում է»:

Նաղդալյանը նշեց, որ միայն այս տարվա ընթացքում Հայաստանի իրավասության ներքո են հայտնվել Ադրբեջանի երկու քաղաքացի և, ի տարբերություն Ադրբեջանի, Հայաստանը իր տարածքում հայտնված Ադրբեջանի քաղաքացիների նկատմամբ քրեական հետապնդում չի իրականացնում, չի դարձնում նրանց ռազմագերի և լիարժեքորեն հարգում է նրանց իրավունքներն ու արժանապատվությունը:

«Ադրբեջանը փորձում է ետ վերցնել իր երկու մարդասպաններին, ովքեր իրենց պատիժը կրում են Արցախում՝ անչափահաս քաղաքացի Սմբատ Ցականյանի սպանության համար»,- նշեց Նաղդալյանը: